Giyak-an sa PDEA

Sulod sa dul-an sa duha ka tuig sukad masakmit ang makalilisang nga shipment sa drug precursors dinhi sa Sugbo diin nalambigit ang mga kawani sa kanhi bise gobernador sa Sugbo nahinanok ang imbistigasyon sa kaso.

Gani hangtud karon wa pa gyuy bisan usa sa mga responsabli ang napasakaan og kaso. Ang kalangan sa kagamhanan sa Australia ug China pagtubag sa hangyo sa mga opisyal sa Philippine Drug Enforcement Agency nga hatagan sila og kopya sa mga dokumento sa maong shipment maoy gihimong tadtaran ni kanhi PDEA director Anselmo Avenido sa iyang kapakyas pagpasaka og kaso hangtud karon. Salamat nga nabuhi ang kainit sa atong mga opisyal paghimo og imbistigasyon sa maong kaso.

Karong buntag tukbilon pagbalik sa House committee on dangerous drugs ang maong isyu ug sukitsukiton si Avenido sa iyang kapakyas pagpasaka og kaso. Posibling hanigan sa mga durugista ug pasanginlang namolitika si kongresista Antonio Cuenco nga maoy nangusog nga imbistigahon ang kapakyas sa PDEA, apan namolitika man o wa si Cuenco angayan nato siyang suportahan sa iyang kawsa.

Di lang kaugmaon sa atong henerasyon ang namiligro tungod sa negosyo sa drugas kun dili lakip na ang kaugmaon sa henerasyon sa atong mga anak ug sa umaabot nilang mga anak.

Atol sa panagtagbo nilang Cuenco, deputy director Reynaldo Esmeralda sa NBI ug sa mga opisyal sa customs niadtong Sabado sa gabii, ilang nahukman nga tinud-on ug pasakaan og kaso ang mga tawo nga nalambigit sa maong kargamento. Lakip gani ang tag-iya sa warehouse nga gigamit nga opisina sa coastside ventures incorporated, ang consignee sa P3.6 bilyones nga pseudoephedrine, ilakip nila sa pagkiha. Makiangayon lang nga ilakip pagkiha ang tag-iya sa warehouse tungod kay sa nabungkag nga mega shabu laboratory diha sa Umapad, Mandaue gilakip man sab pagkiha ang tag-iya sa warehouse.

Di lang ang tag-iya sa warehouse kon di lakip gyud ang mga incorporators sa coastside ventures ang mga kawani ni kanhi bise gobernador John Gregory Osmeña. Posible kahang nalangan ang pagpangisog nilang Cuenco ug sa komitiba ni kongresista Roque Abalan, apan di pa awahi ang tanan aron patubagon sa salaud nilang nahimo ang mga responsabli sa pagpayuhot sa maong gidiling drugas.

Si Cuenco miingon nga di niya lung-an hangtud nga mataral sa hukmanan ang tanang responsabli niini. Kini maoy dugay nang gipaabot sa mabuot nga mga lungsoranon.

Si Cuenco nagtinguha usab nga si Esmeralda matudlo nga maoy mangulo sa imbistigasyon sa maong kaso. Buot langkaton ni Cuenco ang imbistigasyon sa kaso gikan sa PDEA nga wa gyuy nahimo niini ug ibalhin ngadto sa NBI. Ang maong lakang haum ug tukma tungod kay siguradong tyopion sa PDEA ang imbistigasyon sanglit dunay ilang mga sakop nga nalambigit niini. Wa pang kalimot ang publiko nga ang maong kargamento dunay clearance gikan sa PDEA. Kini maoy tataw nga hinungdan nganong ilang giyak-an ang imbistigasyon sa kaso.

* * *

[email protected]