Away sa tubig

Morag nagkainit na ang bangi sa mga politiko ug mga negosyante karon dinhi sa Sugbo kana tungod sa negosyo sa tubig.

Si Mayor Tomas Osmeña ug Capitol Consultant Atty. Pablo John Garcia nangutana sa legalidad sa gisudlan nga kontrata sa Metro Cebu Water District ( MCWD ) ug Ayala. Ila usab nga gipangutana ang kadako sa gipangayo nga bayad ( P200 M ) ngadto sa Ayala kon ugaling dili mahiadto ngadto sa nahisgutang kompanya ang gitawag og Water project.

Samtang ang grupo ni Mayor Teddy Ouano sa Mandaue ug ubang mga mayor ug mga negosyante mipabor o misuporta sa Ayala.

Aron dili mo maglibog atong tinambanon ang sugilon niining maong proyekto nga gisudlan sa Ayala ug MCWD:

Tungod kay daghan na kanato ang usahay wala nay mga ligo ug nanimaho, ang uban gani nangapasmo kay wala makalung-ag og pagkaon kay way tubig ikasabaw kay nagnihit na ang tubig nga giapod-apod sa MCWD ngadto sa iyang mga konsumidor, ang MCWD mopalit og tubig sa Ayala nga gikuha gikan sa Carmen, Cebu nga maoy ipang-apod-apod ngadto sa iyang mga konsumidor.

Apan misupak niini si Mayor Tomas Osmeña ug mga kaubanan kana tungod kay mahal ra, gawas pa, wa usab kuno kini gipaagi sa bidding. Gawas sa Ayala, gusto usab sa Mactan Rock nga makakuha sa maong proyekto.

Usa ray dugukan niining away sa tubig nga atong nasinati karon, ug kana mao ang nagkabangga nga interest sa mga politiko ug mga negosyante nga nagnegosyo ug gustong magnegosyo og tubig. Manghinaut lang ta nga kon si kinsa may makakuha niining maong proyekto dili makalimot sa tagsa-tagsa nila ka mga responsibilidad ngadto sa katawhan nga ilang pagaserbisyohan.

Ug wala untay water terrorism nga mahitabo.