Kunsabo

Makadaghan na kita maghisgot bahin sa fixers sa lainlaing buhatan sa gobiyerno, partikular na sa NSO ug LTO. Sa matag higayon nga maghisgot kita bahin sa mga fixers, may bag-ong mga impormasyon nga atong madawat nga naggikan sa mga magbabasa nga ilang ipadangat pinaagi sa text.

Usa ka magbabasa niining ubos kong lindog nagkanayon: "Good day, Sir. Ang fixer ug empleyado sa LTO kunsabo. Kanang drug test, P50 ang per head sa fixer, sinabotan na kana nila tali sa empleyado sa LTO ngadto sa nagdumala sa drug test dapit sa may South Bus Terminal. Atbang sa LTO mag-videoke sila. Usahay adto sulod sa SBT. Unya paghuman sa inom, magbahin sila sa kinitaan. Mark my word, Sir, 99.9% sure." -- 0920-4274866 (August 9, 2006 -- 08:29:01)

Seryoso kining pasangil sa atong texter. Kon atong basehan ang iyang text, makaingon kita nga nasuheto siya pag-ayo sa operasyon sa mga fixer ug sa gipasanginlan niyang mga empleyado sa LTO nga nakigkunsabo sa mga badlongon. Akong klarohon nga wala pa ako motuo niining maong sumbong. Gipatik ko lang kining maong text aron makabantay ang publiko batok sa mga fixer sa higayon nga mohimo silag transaksiyon diha sa buhatan sa LTO.

Namasin sab ko nga pinaagi niini, maghimog hilom nga pagpaniid ang mga kadagkoan sa LTO kon tinuod ba nga adunay mga empleyado sa maong buhatan nga nakigkunsabo sa mga fixer. Ug kon tinuod man, matumbok ug mailhan kon kinsa kining mga tawhana. Dili maayong pasagdan lang kini sila nga magpabadlong tungod kay magkabulingit ang tibuok buhatan sa LTO gumikan sa kahiwian sa pipila lang nga nagpabadlong. Mao nga angay kining susihon ug sutaon kon tinuod ba kini o dili.

Dili lang una nato kondenahon ang mga empleyado sa LTO tungod lang niining sumbong nga atong nadawat. Sutaon una nato ang tinuod. Pero sa akong pagtimbang-timbang, dako gayod kaayo ang posibilidad nga tinuod nga gitaho sa atong texter. Mao nga angay seryosohon ang paghimog pakisusi mahitungod niini aron madisiplina ang mga badlongon.

* * *

(Sumbong ug reklamo? Text sa 0910-8105522)