EDITORYAL - Daghang pobre nga polis

Kasagaran sa atong mga polis nanginabuhi ubos sa poverty line. Ug ang mga pamilya niini anaa nanimuyo sa slums ug squatter areas.

Kini gibutyag ni Sec. Ronaldo Puno sa Department of Interior and Local Governments (DILG) kinsa mipadayag sa iyang kahisagmuyo sa kondisyon sa pagpuyo sa atong mga polis ug sa ilang pamilya.

Bisan pa sa ilang pobreng kahimtang anaa gihapon sa kadaghanan sa atong mga polis ang dedikasyon sa pag-alagad sa katawhan.

Gidepensahan ni Puno ang kapolisan batok sa mga misaway niini sa pag-ingon nga "unequal" kaayo ang "police-to-civilian ratio" dinhi sa atong nasud. Ang usa ka polis mosilbe og libuan ka mga sibilyan.

Sayod man si Puno sa problema sa atong kapolisan paninguhaon unta niya nga masulbad ang maong problema kay anaa man sa katungdanan diin iyang makab-ot ang solusyon.