PRO kuno

Usa gihapon kini ka modus operandi sa mga badlongon sa katilingban nga angay natong bantayan. Ang kasagaran sa makasinati ug mabiktima niining maong matang sa tinonto mao kadtong mga personahe nga nagbaton og e-mail account. Sa laktod nga pagkasulti, usa kini ka matang sa e-mail scam.

Ang estilo mao nga adunay mopadalag e-mail sa imong account ug magpaila sa ngalan nga ambot kon mao ba gayod ang tinuod nga ngalan sa responsable. Sa iyang e-mail, iya kang patuohon nga usa siya ka press relation officer (PRO) sa usa ka sikat kaayong artista sa Hollywood.

Dugang niini, iya kang patuohon nga ang hinungdan nga nag-email siya nimo mao ang pagpahibalo nga ikaw ang napili sa artista sa Hollywood nga iyang gialagaran nga maoy makadawat sa dakong kantidad sa kuwarta niini nga ihatag alang sa work of charity. Ang subject sa iyang E-mail mao kini: "Think about this! Think about your future!"

Kon gusto ka kunong mopahimulos sa maong kahigayonan, awhagon ka sa pag-email sa usa ka partikular nga e-mail address agig pagsanong sa gitanyag nga oportunidad. Pero kon imo kining tumanon, maglibog ka na hinuon tungod sa kadaghang rekisitos. Una, padepositohon kag kuwarta sa usa ka partikular nga bank account. Ikaduha, pasumbitihon ka og soft copy sa imong resume ngadto sa lain na usab nga e-mail address. Daghang e-mail address ang ilang ihatag mao nga maglibog ka. Mora ba og ila kang lipat-lipaton.

Pero naa gyod gihapoy mailad tungod sa tam-is nilang pasalig. Binilyon god (kuno) ang kuwarta nga imong madawat kon mosanong ka. Pahimangnoan ka pa nga dili itug-an ngadto ni bisan kinsa ang ilang e-mail aron kuno magpabilin kining confidential. Ayaw gayod kamog tuo niini aron dili kamo mailad.

* * *

Sa laing bahin: "Nakapalit kog softdrink nga naay hugaw sa sulod pero wala pa nako ma-open. Asa ta modangop kon moreklamo?"-- 0906-8633094 (Aug. 12, 2006--08:45:16)

Sulayi ang pag-refer niana ngadto sa BFAD. Salamat.

* * *

(Sumbong ug reklamo? Text sa 0910-8105522)