Haw-ang

Nagpabiling kampante ang mga opisyal sa lalawigan sa Sugbo nga dakong supak sa tinguha pagbuak sa Sugbo bisan pa sa pagkapasar sa tulo ka mga balaudnon didto sa komitiba ni kongresista Emilio Macias. Kini tungod kay nahibawo silang daan nga di nang ka-irog ang maong mga balaudnon bisan pa sa pagpasar niini sa committee level.

Wa masayop ang mga opisyal sa lalawigan tungod kay sa miaging adlaw usa sa pito ka mga kongresista nga mibotar pabor pagpasar sa tulo ka mga balaudnon nila ni kongresista Simeon Kintanar, Antonio Yapha ug Clavel Martinez mibakwi na sa iyang boto ug mipirma sa motion for reconsideration.

Si Kongresista Jesus Crispin Remulla miuban sa kapin sa 30 ka mga miyembro sa committee on local government nga miawhag og reconsideration sa pag-aprobar nila sa tulo ka mga balaudnon sa miaging semana.

Si Kongresista Antonio Cuenco mitug-an nga si Remulla miangkon nila nga nasayop siya sa pagsuporta sa Sugbuak bills. Matud pa nga napugos si Remulla pagbutar niini tungod kay duna siyay kaugalingong balaudnon nga natanggong didto sa komitiba ni Macias nga wa matagad tungod sa Sugbuak bills.

Ang pagpirma sa 30 ka mga miyembro sa komitiba ug ang gipaabot pa nga pagpirma sab sa dul-an sa 20 ka laing mga miyembro nagpasabot ni nga nikagar ang maniobra sa mga proponents pagpasar sa ilang mga balaudnon.

Kini tungod kay siguradong ang mga mipirma sa motion for reconsideration di na man mopirma sa committee report nga magduso sa pag-aprobar sa mga balaudnon ngadto sa committee on rules aron ilakip sa calendar alang sa plenary discussion.

Di sab mahimo nga unom lang ang mopirma sa committee report tungod kay wa ra ni sa kumingking sa gidaghanon sa mga miyembro sa komitiba. Aron matawag nga balido ang committee report gikinahanglan ang pirma sa mayoriya sa mga miyembro sa komitiba nga sa akong tan-aw kuli nga makab-ot. Intunsis, di maduso didto sa rules committee ang report ni Macias.

Sa ilang motion for reconsideration ang 30 ka mga kongresista, lakip niini ang atong mga kongresista sa Sugbo nga sila si Cuenco, Raul del Mar, Eduardo Gullas ug Ramon "Red" Durano, miingon nga imbalido ang pagpasar sa tulo ka mga balaudnon kini tungod kay pito lang ang nibotar pabor niini. Gawas niini nisibog pa gyud ang usa nga si Remulla.

Ang komitiba dunay kapin sa 70 ka mga miyembro, busa angayang 35 ang boto nga kinahanglan aron pagpasar sa balaudnon. Gitataw sa mga kongresista nga nangayo og reconsideration nga way petition gikan sa mga lungsod sa Sugbo nga nag-awhag sa pag-umol og buwag nga mga probinsiya.

Gawas niini matud nila nga kinahanglang dunggon ang sentimento sa mga Sugboanon sa maong isyu pinaagi sa pagpahigayon og public hearing.

* * *

Utang ni DILG undersecretary Lito Ruiz ang iyang pwesto ni Presidente Gloria Macapagal Arroyo. Ang maayong relasyon sa iyang asawa nga si kongresista Nerissa Soon Ruiz ngadto sa presidente maoy hinungdan nga natudlo siya sa maong pwesto.

Apan, unsa kahay ikasulti sa presidente kon masayod nga gibitbit ni Ruiz isip iyang sinaligan sa iyang buhatan mao man hinuon ang usa sa mga lider sa oposisyon dinhi sa Sugbo sa miaging eleksiyon. Nasayod kaha ang Malakanyang nga gibitbit ni Ruiz diha sa DILG ang kanhi urban poor commissioner panahon ni Erap Estrada nga si Edward Ligas?

Si Ligas aktibong lider sa JEEP ni Erap ug didto mosuporta sa higpit nga karibal sa politika ni Arroyo sa miaging eleksiyon nga si action king Fernando Poe Jr. Gani kon nahinumdum mo usa siya sa mga gipasanginlang players niadtong "hooded men" nga gidakop sa National Bureau of Investigation tungod sa matud pa operasyon sa pagpanikas.

Kon mahibaw-an sa Malakanyang ang gihimo ni Ruiz di kaha siyang hinginlan sa iyang pwesto tungod sa pagkaingrato? Dili ba ingrato ang tawag sa usa ka tawo nga gihatagan na og pwesto apan inay nga magpasalamat gibitbit na hinuon ang kontra sa naghatag niya sa pudir.

fplanguido@yahoo.com