Mga extension sa bangko!

Makalusot lang gihapon kining modus operandi sa mga driver ug konduktor sa mini bus nga magbiyahean ngadto sa kalungsoran sa amihanang Sugbo. Ang buot kong ipasabot nga modus nila mao kanang pagpanglingkod nila sa mga pasahero sa mga extension nga bangko nga makadugang sa kapiot ug kahuot sa sulod sa sakyanan.

Mao diay nga di masakpan nga nagbaton silag extension nga lingkoranan tungod kay sa dili pa sila molahos sa terminal, ang maong bangko ilang ibilin sa usa ka tindahan. Inigbalik nilag biyahe ngadto sa ilang rota, hapiton na lang nila ang maong bangko ug bisan puno na ang mga lingkoranan, mopasakay gihapon sila kon adunay mopara nga pasahero sa highway ug palingkoron sa maong extension nga bangko.

Kasagaran niining maong mga driver ug konduktor sa mini bus anha mobilin sa ilang extension seat sa usa ka tindahan nga nahimutang saylo og gamay sa Makro. Maong wala gayoy dag-anan kanila ang mga awtoridad nga nagtinguha unta sa pagpahunong na niining estilo sa pagpalingkod sa pasahero sa extension seat. Makahuot man god kini sa sulod sa sakyanan, ilabi na kon ang mga pasahero daghan og bagahe.

Usa ka magbabasa niining lindog nga tag-iya sa cellphone no. 0910-7227136 ug nagpaila sa ngalana nga Bogoy nga taga Barili mipadangat kanako sa iyang reklamo bahin sa usa ka trabahante o kawani sa NSO. Niya pa, adunay trabahante ang maong buhatan nga ang pamatasan dili makiangayon. Sa iya pang pinulongan, walay etiquette ang maong empleyado sa pag-deal og client. Partikular nga gireklamo sa atong texter ang empleyado nga naa sa payment section.

"Di siya angayan motrabahog gobiyerno," nagkanayon ang atong texter. "Unsaon na man lang kaming dili pa suheto sa ilang pamaagi, sayonsayonon lang mi og banghag. Di gani ta makapangutana kay bisan unsaon pagdukdok ang window during office hours di gyod mo-entertain. Taga Ronda daw na siya."

"Akong klarohon nga wala ako motuo niining maong alegasyon. Gipatik ko kini aron mahimoan unta og pakisusi kon tinuod ba kini o dili. Ang binuhatan sa usa ka badlongong empleyado makaduhig sa buotan nga mga trabahante sa NSO kon dili kini makorehian.

(Sumbong ug reklamo? Text sa 0910-8105522)