Hala pangdakpa!

Nalipay ko pagkasayod nga ang Office of the Ombudsman nagmugna og task force nga gitahasan paghimo'g kampanya batok sa mga sakyanan nga iya sa kagamhanan apan gamiton sa personal.

Daghan kaayo kini dinhi sa Sugbo. Kaniadto g'yod, sa matag ingon arong adlawa - Domingo - makita nimo diha sa beach resort apan tungod kay daghan na man ang moreklamo, panagsa na lang.

Walay labot hinoon kining mga Kaoshiung buses nga iya sa dakbayan sa Sugbo kay gibayran man kana, o kaha duna may pagtugot gikan sa kadagkoan sa dakbayan.

Apan tan-aw nako, mora'g nagmika lang ang kadagkoan sa Commission on Audit kay wala nila mahimoi og lakang kining mga sakyanan sa kagamhanan nga nagdala tinuod og "red plate" apan walay marka nga "For Official Use Only" ang kilid.

Ang balaod naglatid nga gawas nga "red" ang plate numbers sa mga sakyanan sa kagamhanan, butangan g'yod og marka ang kilid sa sakyanan ug ang gidak-on tulo ka pulgada kon "3 inches."

Kon wala go'y marka ang kilid sa sakyanan, dali ra nga ilisan og plate numbers sa sakyanan, lisud na mailhan nga iya ba kini sa gobyerno. Sa ato pa, mahimo na nga gamiton sa personal.

Daghan kaayo ko'g mga nakit-an nga sakyanan sa kagamhanan nga walay marka nga "For Official Use Only" diha sa kilid. Maayo unta og matagad na kini sa mga opisyal sa COA.

Nahinumdom mo nga si Cebu Port Authority (CPA) general manager Mariano Martinez gipasuspenso og unom ka buwan. Unsaon nga gigamit man niya ang sakyanan sa gobyerno paghatud ug kuha sa iyang anak sa tunghaan.

Duna koy nadunggan nga magsisibya sa radyo nga miingon nga mahimo ra nga mosakay ang mga anak sa opisyal ug kawani sa kagamhanan, basta ang tunghaan agianan lang paingon sa trabahoan.

Buyno, tingali "humanitarian reason" apan ang lagda nga gilatid sa COA Book of property custodianship, nga mora'g wala pa g'yod mausab, nagdili g'yod.

Mao bitaw to nga si magsisibya Choy Torralba mihandom nga ang kanhi niya amahan nga si Koronel Ramon Torralba bisan og nag-uwan pa dili g'yod mopasakay kanila paingon sa tunghaan bisan og agianan pa ang ilang eskwelahan.

Mao kadto'y opisyal sa kagamhanan nga matinumanon gayod sa balaod, dili sama anang uban diha nga gamiton ang sakyanan sa kagamhanan sa paghatud ug kuha sa ilang anak sa tunghaan.

Sama sa usa ka multicab sa Citom nga pirming gamiton sa usa ka traffic enforcer paghatud sa iyang anak matag buntag paingon sa Zapatera Elementary School.

* * *

Salamat diay ni Carlos L. Limpangog, kawani sa Mandaue City treasurer's office, nga nagsunod kanunay sa atong lindog. Sagdi lang Mr. Limpangog ug panagsa ra ta magkauban, unsaon nga gihatagan man usab og higayon ang uban.

Mosuway lang ta unya og hangyo nga dugangan ang mga adlaw sa atong lindog. Usbon nako, salamat sa imong pagsunod.

* * *

Naghisgot na man ta og Mandaue, kumusta diay ni higalang Jonkie Ouano, anak ni mayor Thadeo Ouano. Wala na g'yod mi magkakita si Jonkie, unya na tingali'g mahimo na siyang mayor. He! He!

Bitaw, daghan karong lider sa kabarangayan diha sa Mandaue ang nagtinguha nga human sa termino sa iyang amahan, siya ang mobanos sa pagdagan pagka mayor.

Ngilngig ni si Jonkie uy, sayonan ka nga sa tibuok nasud, si Jonkie napasidunggan isip managing director of the year man tingali kadto tungod sa maayong pagdumala niya sa gidumala niyang "private business."

Kon siya na ang modumala sa Mandaue, aw sigurado usab nga molambo.