Ermita ug Pasil

Sa gula sa Banat News niadtong Mayo 28, 2006 maoy akong gihisgotan dinhi ning ubos kong lindog ang mahitungod sa text sa usa ka magbabasa nga namasangil nga may mga polis nga manguwarta sa video karera operations. Gumikan sa maong pagbutyag, nakadawat kog laing text, dili aron pagpanghimakak sa maong pasangil, kondili aron pagkompirmar nga tinuod gayod kini.

Ang text nagkanayon: "Nakabasa ko sa imong column nga naghisgot bahin sa mga polis nga manguwarta sa karera. Tinuod gyod kana, Sir. Si Lary maoy dakong operator sa karera. Taga Ermita kana siya, silingan namo. Daghang karera diri, hasta sa Pasil. Kon tinud-on lang gyod nig gukod sa mga polis, masumpo gyod ni. Ugaling lang kay hasta ang ahensiya sa polis gihatagan man aning Lary. Labina ang mga polis sa Carbon, kada semana sila mangayo. Naa pay tagsa ka sakong bugas kada semana. Sa Ermita sobra sa 300 ang karera. Ang NBI gyod unta ang angay mo-raid ug i-house to house gyod." -- 0921-7220340 (May 29, 2006- 16:04:29)

Grabe na gyod ka seryoso kining maong pasangil. Akong klarohon nga dili ko kombinsido nga tinuod gayod kini. Pero ako kining gipatik aron masayran kini sa kadaghanan ug makab-ot ang kasulbaran pinaagi sa kooperasyon sa tanan nga magpakabana niining maong suliran. Angayan gayod nga masusi kon unsa kini ka tinuod. Kon atong basihan ang text, kaylap kaayo ang video karera sa Ermita ug Pasil.

In fairness sab ngadto sa kapolisan sa Carbon, maayong masusi ug mailhan kon kinsa gayod kining mga polis (kon tinuod nga aduna gyod) nga maoy nakadawat og protection money gikan sa mga video karera operators sa Ermita ug Pasil. Aron ba dili malaspa sa pagkaduhig kadtong mga polis nga nagtinarong.

Uyon ko sa sugyot sa atong texter nga maayo gyod nga ang NBI maoy mo-raid ug i-house to house gyod ang pagpahigayon sa maong operasyon. Apan kinahanglang mokooperar niini ang mga opisyal sa barangay nga mao gayod ang mas nasuheto sa kahimtang sa ilang barangay.Sakto gyod ang atong texter nga kon tinud-on lang gyod paggukod ang video karera sa kapolisan, masumpo gyod kini. Maapsan gyod kay dili man modagan ang video karera. Ang nakaparat kay wala lagi tinud-a!

(Sumbong ug reklamo? Text sa 0910-8105522)