Polis badlongon

Padayon ko nga nakadawat og mga report kabahin sa mga polis nga nalambigit og binuang dinhi sa dakbayan. Sa laktud, sila maoy mga polis nga daw "hubog" kay dili man makasubay sa tarong nga dalan.

Dunay nagpahibalo nako nga sigi man diay gihapon ang tigbakay diha sa barangay Caretta nga giingong giprotehean og polis. Ako na lang g'yod ni nga gipahibalo ang maong lugar aron mauwaw usab ang mga opisyal.

Kamong mga opisyal sa barangay Caretta nga gipangulohan ni Kapitan Marciano Ando, dili ba kamo mauwaw nga dili ninyo masanta ang tigbakay nga anha sagad himoa sa nataran sa balay sa polis?

Unsa god tawon mo? Maayo ba lang diay kamo mohimo'g operation kon walay polis nga nalambigit? Ikaw Kapitan Ando, ayaw ko'g ingna nga wala ka masayod nga dunay tigbakay nga gipahigayon diha sa imong barangay?

Usa nako ka higala nga polis miangkon g'yod nga dunay tigbakay diha sa barangay Caretta ug nga ang iyang higala nga polis maoy nagpasiugda.

Ang tigbakay sagad himoon matag weekend, sa ato pa Sabado ug Domingo ug sa mga adlaw nga fiesta opisyal. Last warning nako sa maong polis nga mohunong na sa iyang pagpasiugda og tigbakay kay law-ay kaayo tan-awon, ilabi na nga anha kini sa imong nataran himoa.

* * *

Laing report nga akong nadawat nga naglambigit og binuang sa polis mao ang paghimo og kampanya batok sa video karera, apan ang mga butang nga nasakmit, igo lang nilang gipangawat, wala dad-a sa police station.

Unsaon, nga sigun sa report nga akong nadawat ang duha ka polis wala man madistino dinhi sa Sugbo.

Ang text message nga akong nadawat nagkanayon nga ang mga polis nga kusog kaayong mangawat og video karera usa ka "PO3 A" ug opisyal nga nagdala sa bansagon nga ang sinugdanan " T."

Ang illegal nila nga kalihukan gihimo pipila ka adlaw ang milabay diha sa Sindulan, Mabolo; sa Labangon ug diha sa barangay Tejero.

Gitug-anan ko sa plate number sa puti nga multicab nga gisakyan sa mga polis nga nagbinuang, apan ako lang usa nga gipugngan.

Human ko makadawat sa maong inpormasyon, nahinumdom ko nga dili bag-o kanako ang maong mga ngalan.

Kamong mga polis angay g'yod mo nga magtinarong. Kamo unta maoy modelo sa katawhan.

Ambot, kining opisyal nga bansagon og "T" paryente ba kaha niadtong higala nako nga opisyal nga nagpuyo kanhi diha sa PC compound sa Gorordo avenue.

Paminaw nako dili tingali kay buotan man kadtong maong opisyal, wala man ko makadungog og bati nga report bahin niya. Ang akong ikasulti ninyong duha ka polis "bisto na ang inyong baraha."

* * *

Husto ang baruganan sa mga konsehal sa dakbayan nga misupak sa sugyot nga dili pabayron og amusement tax ngadto sa City Hall ang tigpasiugda sa pagpasundayag sa away ni Manny Pacquiao diha sa usa ka sinehan sa SM City ugma.

Angayan nga hinay-hinayan ni Konsehal "Jack" Jakosalem ang paghatag og diskwento sa mga tigpasiugda og mga kalingawan. Mag-unsa man god na nga tugotan lang ang tigpasiugda nga mohatag og 10 porsiento sa ilang gross income.