EDITORYAL - Bag-ong city jail gikinahanglan

Ang disgrasya nga nahitabo sa city jail adtong miaging Martes diin lima ka mga binilanggo ang nangamatay human sila nakuryentihan maoy laing pruweba nga ang maong bilanggoan kinahanglan nang i-condemn ug ilisag bag-ong prisohan.

Ang city jail kun Bagong Buhay Rehabilitation Center (BBRC) karaan na kaayo ug wa na magsubay sa mga lagda kun practices sa penology sa atong panahon.

Masayon ra kaayo pasudlan og mga butang nga gidid-an sama sa mga armas ug iligal nga drugas. Masayon usab eskapohan sa mga piniriso.

Daghan nang nangasakit ug nangamatay nga mga binilanggo diha sa gihisgutang prisohan.

Ang nahitabo nga disgrasya niadtong Martes mipaila lang nga wala o kuwang ra ang safety measures nga gi-adopt ang mga tigduma sa maong bilanggoan kay kun duna pa wala unta nahitabo nga nakuryentihan ang lima ka piniriso.

Biyaan ta na kanang BBRC magpahimo tag bag-ong prisohan diin luwas ang mga priso- luwas sa tanang katalagman.