Luok sa edukasyon

Nakalimot tingali nga gideklarar niyang milagruso nang nasulbad ang suliran sa kakuwang sa classrooms, human niya labhi si Education Secretary Fe Hidalgo atubangan sa mga sakop sa gabinete ug sa media sa niaging semana, si Pres. Arroyo nimando sa dinaliang pagtukod og payag-payag nga mga kahimoan sa klase sa naghuot nga mga tinun-an. Ang Department of Public Works and Highways (DPWH) ug ang Armadong Kusog maoy iyang gisugo pagpakatap sa ilang mga inhinyero sa pagdugang sa classrooms sa mga tulonghaan nga gawas nga nag-sinardinas nagbaha pa gyong mga tinun-an.

Ambot tungod ba sa iyang kasaputon ug kabangis nga mangasaba, o pagtila ra gyod sa iyang lapalapa ang nahibaw-an sa mga itoy nga naglibot niya, way nangahas pagpahinumdom sa presidente nga nakasugod nang klase niadtong Lunes busa ang pagtukod sa dugang classrooms karon uwahi na kaayo. Hinuon, mas maayo na lang ang uwahi kay sa wa gyod. Hinaot nga gihimo ni sa presidente kay naamgohan nga di tawhanon ang iyang pagpamugos ni Hidalgo nga ilumpong ang 100 ka tinun-an sa usa ka classroom inay mangambisyon sa 1:45 nga ratio.

* * *

Human sa makauuwaw nga kasinatian ni Hidalgo, way nagtagad pagtawag sa atensiyon sa presidente nga kon tinuod ang iyang pasalig nga pagpalambo sa edukasyon ang nag-unang gimbuhaton sa iyang administrasyon, nganong nagpaabot man siyang magsugod nang klase una dugangi ang dugay nang nahibaw-an nga nagnihit nga classrooms?

Kon tinuod nga giisip niyang edukasyon nga maoy mahinungdanong kahimanan pagpalambo sa Pilipinas aron motupong na sa labing adunahang mga nasud sa tibuok kalibotan, dali ra man kaayo siyang nakabaraw sa tinguha sa mga senador pagdugang og binilyon ka pesos sa budget sa edukasyon karong tuiga-aron matiwas na gyod sa kataposan ang pagtukod sa tukmang gidaghanon sa classrooms, pagkuha sa tukmang gidaghanon sa mga magtutudlo ug pagpamalit sa tukmang gidaghanon sa mga libro-pinaagi sa paglaslas sa gipaburot nga gahin alang sa buhatan sa presidente?

* * *

Ang tinuod mao nga sama sa iyang pagpanamastamas sa ubang institusyon sa nasud, si Pres. Arroyo wa managana pagkabayo sa edukasyon sa nangalisbo niyang pamolitika-ang pagpabilin sa Malakanyang sa bisan unsang paagi-bisan unsa kalang-og ug kalapukon. Sukwahi sa iyang pagarpar, wa siyay programa sa malungtarong pagpalambo sa edukasyon. Kon makumbinser nga ang burong nga katawhan maoy panagang aron di mapalagpot sa gahom, siyay mangunay pagluok sa pagsuway pag-edukar nila.

Ang iyang pagsabod og tag-P1 milyon nga scholarship fund alang sa matag kongresista nga wa mopirma sa impeachment complaint batok niya sa niaging tuig gikahadlokang pasiuna lang sa mas dakong pagpabaha sa way kinutobang mga haylo ug panghudlat pagtino nga di talikdan sa iyang mga alyado ang iyang desperadong paugat sa gahom.

* * *

Email: [email protected]