Mag uniporme

Usa ka magbabasa niining ubos kong lindog mitaho kanako pinaagi sa text nga adunay mga mangunguot nga anha mamiktima sulod sa mga department stores sa downtown area sa dakbayan sa Sugbo. Matud pa sa atong texter nga ang iya mismong ig-agaw nabiktima niining maong tinonto sulod sa usa ka dakong tindahan diha sa Colon area.

* * *

Gibutyag sa atong texter nga tag-iya sa cellphone number 0927-2209338 ang ngalan sa maong tindahan apan nakahukom kong pugngan kini kay akong nakita nga wala na kinahanglana. Ang importante mao nga atong kapahimangnoan ang atong kaigsuonan bahin niining maong mga mangunguot nga mosulod sa mga department stores.

Sumala sa atong texter, bag ug pitaka maoy target sa maong mga mangunguot. Magsul-ob og uniporme sa estudyante ang mga suspek mao nga dili gayod kadudahan nga mga tawo silang daotan. Kasagaran anha sila mopasalir sa ilang tinonto sa grocery ug panaptonan.

"Mas maayong butangan og polis kanang mga lugara," nagkanayon ang atong texter nga dako kaayog pagpakabana sa atong kaigsuonan.

Nindot unta lagi nga butangan og polis ang maong mga lugar. Pero dili gyod gihapon maahom sa mga polis ang pagbantay. Ang angay gyod buhaton mao nga kitang tanan magbantay kanunay aron dili mabiktima niining mga mangunguot nga mag-uniporme nga mosulod sa mga department stores.

* * *

Sa laing bahin: "Palusot lang gihapon ang LTO sa ilang emission. Perting daghana na nga mga sakyanan ang nasundan nako nga perting asoha ug itom kaayo ang gibugwak sa ilang tambutso ilabi na ang mga jeep nga pasaheroan ug mga dagkong trak. Hilam-os ta pirme sa pollution." -- 0920-9127357

Kini bitaw'ng bahin sa emission, mahibulong gyod ta tungod kay kon tinuod pang estrikto ang pagpatuman niini, nganong daghan pa man kaayong mga sakyanan nga gipasagdang nagdagan-dagan nga itom kaayog aso.

(Sumbong ug reklamo? Text sa 0910-8105522)