Mga sugarol nagpustaanay

Naalad, Naga, Cebu

"Too late the hero" ang angay'ng ipanahom nato niining atong halangdong Mayor Tomas Osmeña ning siyudad sa Sugbo. Ngano man? Tungod kay gipalabay niya ang upat ka tuig una pa mosang-at og petisyon alang sa pagbasura sa Talisay nga nahimong siyudad.

Kini si Tomas mahulagway nato nga anaa sa iyang pagtuo nga ang iyang pagkalantip og salabutan dili lamang ning atong siyudad kon dili sa tibuok lalawigan sa Sugbo, tungod kay way nakapugong sa iyang hukom bisan pa diha sa alirong sa iyang mga abogado. Sabton nga mas abogado pa siya kay sa iyang mga abogado.

Samtang kining maong "abogado" Tomas Osmeña mipahibawo nga moapelar siya sa Korte Suprema, ang mga sugarol nagpustaanay na kon modaog ba siya sa iyang apelasyon. Ang kasagaran sa maong pustaanay tinunga ... sabton nga ang usa ka gatus ka pisos (P100.00) sa taga anti-Osmeña batok lang og kalim-an ka pisos (P50.00)

Nganong naingon man niini nga naniguro gyud sila nga dili modaog kining maong abogadong Tomas Osmeña? Kini diha ipasukad nila sa pamahayag ni Talisay City Legal Officer Aurora Econg nga nagkanayon: ang Court of Appeals mimando nga ang Republic Act 8979 nga nag-umol sa dakbayan sa Talisay walay gilapas nga lagda sa atong Batakang Balaod.

Apan kining gipamahayag ni Atty. Econg wa da kini sa komingking sa malag-it nga panglantaw ni "Atty." Tomas Osmeña.

Maayo tingali nga pahinumduman ko kining maong abogado nga matag lihok sa tawo aduna gayuy tugbang mamaayo man o madautan. Sabton nga magminaayo ka sa imong isig katawo, sama sa pagtabang kon nagkinahanglan sila og panabang, tagdon nimo ang imong isig katawo sa maayong pagtagad.

Dili kay ang usa ka mamaligyaay og barbecue gihampak ang nawong sa maong kabus ug timawa nga matawag lamang gani og abog sa dalan nga mahamis nga tiil sa mga sapian sama ni Tomas pagatumban. Kadtong barangay kapitan sa Sudlon I nga si Kapitan Jayme diin dihay pong mga nalagutan kining maong mayor gisinggitan niya pinaagi sa pag-ingon; pahawa ning akong buhatan! Migawas sa maong buhatan si Kapitan Jayme nga nanglipaghong sa tumang kauwaw.

Ang mga mamaligyaay og kandila diha sa Sto. Niño nga imong gipapahawa diin kadaghanan niini dili gani makatuman pagkaon og makatulo sa usa ka adlaw, niadtong panahona, gisag-ulo na lang ang ilang pamahaw, paniudto ug panihapon.

Kadtong mga tindera nga taga Talisay nga naninda diha sa Pasil ning siyudad sa Sugbo, gipapahawa tungod sa ilang sa'a nga mao ang pagka taga Talisay, wa ka diha makahanduraw sa baha sa mga luha sa ilang kahigwaos ug kabalaka sa ilang kahimtang?