Ayaw pailad

Bisan dugay nang naglihok kining text scam apan ingon sa daghan pa gayod ang wala masayod mahitungod niini. Daghan pang makurat kon makadawat silag congratulatory message nga nagpahibalo nga nakadaog silag dakong kantidad sa salapi. Magtuo dayon sila nga tinuod kini. Mao nga daghan pa gyod ang nalingla sa text scam bisan dugay na kining midagsang ug halos makapila na nato subli-sublia ang pagpahimangno sa atong kaigsuonan mahitungod nini.

* * *

Niay text nga akong nadawat nga nagkanayon: "I'm one of your Modus column reader. I have just received a text message which states: 'Congratulations! PGMA Charitable Foundation. Your SIM number have won this day, April 18, 2006, P680,000. Per DTI Permit no. 0010. For more info please call Sec. MM (initial).' Ano ba itong text na 'to? Sayang din, diba? Puwede ba itong pagkakuwartahan? O tayo ang pagkakuwartahan nila? From Lapu-Lapu." -- 0920-7903802 (April 18, 2006--13:25:07

* * *

Salamat sa imong text. Base sa imong giasoy, nasabot ko nga nagduda kag diyotay kon tinuod ba ang text nga imong nadawat o dili. Pero nasabot gyod nako nga hapit ka na gyod makombinser sa nagpadala kanimo sa congratulatory message. Nahinugon ka god kon pananglit tinuod man nga nakadaog ka. Maayo gani kay wala ka gayod magpahinayak.

* * *

Ang akong ikasulti mao nga ayaw'g tuo niini. Ayaw pailad! Dakong posibilidad nga ang nadawat mong text message usa ka text scam. Kon charitable foundation man ni PGMA ang nagpasiugdag promo, labing seguro dili ipaagi sa text ang pagpahibalo sa mga mananaog. Labing seguro nga himoon kini sa pormal nga paagi. Kanang nagpasiugda sa text scam nga migamit sa ngalan nga PGMA Charitable Foundation, naghugawhugaw lang nag samot sa ngalan ni PGMA. Kon masakpan kana sila, angay gayod kana silang pasilotan sa Presidente. Nakaseguro kong walay kalambigitan si PGMA nianang ilang binuang nga text scam ginamit ang iya kunohay nga charitable foundation. Mao nga ayaw gayod kamog tuo sa ingon niini.

* * *

Ang texter 0926-5077891 nagtaho kanako nga diha sa barangay Bancasan, San Remigio, Cebu naa kunoy mga tawo nga maglakaw kada adlaw nga katingad-an. Maayong masusi kon unsa kanang mga tawhana.

(Sumbong ug reklamo? Text sa 0910-8105522)