Sa Laray

Usa ka magbabasa niining lindog nga tag-iya sa cellphone number 0919-5940461 mi-text kanako aron pagsumbong bahin sa iyang nasayran nga operasyon sa ginadiling drogas diha sa may Laray San Roque. Dili lang nako ibutyag ang iyang ngalan kay basin og kainitan siya sa mga kanahan.

Sumala sa iyang text kanako, anaay mga drug pusher diha sa Laray San Roque. Ingon sa dayag na kaayo kining payuhot og drugas diha sa maong dapit. Akong klarohon nga wala pa ako motuo niining maong taho, pero mas maayo nga himoan kinig pakisusi aron masuta kon unsa kini ka tinuod. Aron ba maklaro ang tanan kon tinuod ba kini o dili.

* * *

"Asa man ta makatug-an niini, Sir?" nagkanayon ang atong texter.

Para nako, labing maayo gayod nga imo kining i-refer ngadto sa kapolisan aron ila kining masusi. Kon dili ka buot magpaila sa imong kaugalingon, himoa lang ang pagsumbong ngadto kanila sa labing sekretong paagi. Ang importante mao nga makaabot ngadto kanila ang imong isumbong nga kasayoran.

Manghinaot usab kita nga pinaagi niining ubos kong lindog makaabot sa kasayoran sa kapolisan kining imong sumbong. Magtinabangay kita aron masumpo kining kalihokan sa illegal nga drugas. Dili man tingali hinuon masumpo sa hingpit pero, at least, matibhangan gayod ang suliran. Mao nga motabang kita sa kapolisan.

* * *

Sa laing bahin: "Ngano man ang LTO ug CITOM nga tapad ra man unta kaayo sa South Terminal nga wa man makadakop nianang mga sakyanan nga pangpubliko nga way saktong tail lights ug headlights ug wa say klarong plaka ug smoke belcher? Mao man unta kini ang unahon kay pangpublikong sakyanan kini. Mga driver sab niana kay way mga disiplina sa karsada." -- 0918-6230070

Mao ba? Buyno, manghinaot kita nga mahatagan nag pagtagad sa duha ka buhatan nga imong gihisgotan kining imong gisumbong. Ila bayang giakuta kining problemaha. Ugaling lang kay tungod sa kadaghan sa mga badlongon, dili nila maato sa pagdakop. Mao nga atong panghinaoton nga magpadayon ang ilang kakugi ug doblehon ang ilang paningkamot kalabot niining maong suliran.

(Sumbong ug reklamo? Text sa 0910-8105522)