Reklamo batok traysikad driver

Dili lang mga porter ang gireklamo sa mga pasahero nga nagpabadlong diha sa pier area kondili lakip usab ang mga traysikad driver. Ug dili lang kay kausa ra ako makadawat og reklamo batok sa mga traysikad driver diha sa pier kondili kadaghan na. Lainlain lang ang reklamo sa mga pasahero.

Usa sa mireklamo mao ang tag-iya sa cellphone number 0910-4676108. Ang iyang gireklamo mao kanang mga traysikad driver nga mosugat sa mga pasahero nga mokanaog gikan sa barko nga daghan og bagahe. Naay pipila kanila nga bastos ug walay batasan. Imbes nga makatabang sa mga pasahero, magdulot na hinuon og puwerhisyo.

Matud pa sa reklamante nga kining badlongon nga mga traysikad driver mangilog sa bagahe sa mga pasahero. Ikarga dayon nila ang bagahe sa ilang traysikad bisan wala pa sila makigsabot sa tag-iya niini. Ila kuno kining ihatod ngadto sa taxi nga nag-parking sa unahan. Bisan mobalibad ang tag-iya sa bagahe apan dili sila mamati. Ikarga gayod nila ang bagahe sa ilang traysikad ug ihatod ngadto sa nahimutangan sa taxi.

Pagkahuman, mangayo silag dakong kantidad ngadto sa tag-iya sa bagahe isip bayad (kuno) sa ilang kahago sa pagkarga. Walay mahimo ang tag-iya sa bagahe gawas sa pagbayad kay magpasuko-suko man dayon ang mga kanahan. Mao nga ang pasahero nga dili gusto og gubot, mobayad na lang bisan nagkusmod ang buot.

Maayong mapitol kining maong matang sa traysikad driver. Ug kamong mga pasahero, pagbantay kamo nga dili mabiktima niining mga tawhana. Mga abusado kini sila. Mamugos gyod sa ilang serbisyo bisan wala kinahanglana sa pasahero. Bagag nawong!

* * *

Sa laing bahin: Ang akong problema mao ning mo-send dayon ang 206 ug 235, hasta lima ang mosulod sa akong cellphone. Mo-send dayon og picture. Mahurot dayon ang akong load kay kuhaan man. Kon mag-load ko og P30, hutdon gyod. Haskang paita!" -- 0919-3515503

Kon dili gyod tagdon sa network provider nga naghimo niini ang atong reklamo, usa ray alternatibong sulbad nga akong nahunahunaan. Mobalhin sa laing network provider nga wala pa kaayo mabaniog nga naghimo niining lisod sabton nga pagkuha sa load nga wala magamit o gamita.

Sumbong ug reklamo? Text sa 0910-8105522