EDITORYAL - Sinsitibong butanga

Adunay mitumaw nga kontrobersiya kabahin ni Hudas Iskaryote (Judas Iscariot), usa sa dose ka disipolo ni Hesus kinsa matud pa sa atong pagtulon-an mitraydor sa atong Ginoo.

Usa ka kodex kon manuskrito nga napalgan sa disyerto sa Ehipto (Egypt) gikaingon nga nagdala kini sa Ebanghelyo kon Gospel of Judas (Iscariot) diin gisaysay ang pagkabayani ni Hudas sa kinabuhi sa atong Ginoo niadtong dinhi pa kini sa kalibutan.

Sensitibo kining butanga ug bisan ang mga eksperto nagpadayon pa og lantugi bahin sa katinuod o dili sa maong Gospel of Judas.

Busa dili kita angay'ng motuo lang dayon sa mga kunohay eksplenasyon ni bisan kinsa lang nga nagpatuo nga siya -- sila-- adunay kahibalo sa maong kontrobersiya.

Sud sa daghang mga siglo upat ra ka Ebanghelyo ang akseptado sa Simbahan ug kini anaa sa mga Bibliya -- ang mga Gospel ni Matthew, Mark, Luke ug John.