EDITORYAL - Staple wire ayaw'g gamita

Si Sen. Lito Lapid mipasaka og balaudnon diin gidid-an ang mga food manufacturer sa paggamit og staple wire sa pag-seal kun pagserado sa pakete sa ilang produkto.

Ang senador mihimo sa maong lakang gumikan sa daghan nang hitabo nga nada'a pagkaon ang staple wire sa kustomer sa maong produkto.

Pipila na ka tuig nga minglabay, ang Banat News miawhag sa mga produktong pagkaon sa dili paggamit og staple wire human nakadawat kining pamantalaan og mga taho nga dunay naospital tungod kay nakatu'on og staple gikan sa snack food nga ilang napalit.

Karon nakamatngon na ang mga food products producer sa kadelikado sa staple wire isip paagi sa pagserado kun pag-seal sa ilang produkto.

Bisan pa, kinahanglan nga hatagan og pag-atiman sa balaudnon ni Senador Lapid diin ang tinguha niini mao ang kaluwasan sa publiko.