Mangilog og bagahe

Mga suki, nagdugang ang gidaghanon sa mga magbabasa niining lindog nga misumbong kanako sa ilang kasinatian mahitungod niining mga badlongon sa katilingban nga mangilog og bagahe. Sa laktod nga pagkasulti, mamugos kining mga tawhana aron makakuwarta ngadto sa tag-iya sa bagahe.

Dili pa lang dugay, gibaha na usab ang akong cellphone sa daghang text messages mahitungod niining maong matang sa modus operandi. Ang texter nga nanag-iya sa cellphone number 0927-9101830 miingon nga diha sa South Bus Terminal adunay mga lalaki diha nga mangilog sa bagahe nga dala sa pasahero. Ang nakaparat kay bisan asa lang kuno dad-on sa maong mga lalaki ang bagahe sa pasahero.

* * *

Dili kay kana ra. Kon moangal ug moreklamo ang pasahero nga tag-iya sa bagahe, masuko kuno ang maong mga lalaki ug manghulga pa. Morag dili kini maayo, da. Makahatag og kahasol sa mga pasahero kining mga tawhana. Maayo unta nga masumpo ang ilang tinonto.

Nag-text usab nako ang tag-iya sa cellphone number 0920-5892351 ug mitug-an nga nakasinati usab siya nga giilogan siyag bagahe. Para niya, makahasol gayod kining maong buhat sa pipila ka badlongon tungod kay mapugos ka man paghatag og kuwarta ngadto sa nagbaswat sa imong bagahe bisan wala unta kini maapil sa imong budget sa pagbiyahe.

* * *

Gawas niini, nag-text usab kanako ang tag-iya sa cellphone number 0910-4676108 ug gisumbong niya ang iyang kasinatian bahin sa mga traysikad driver diha sa may pier. Makahasol gihapon sa mga pasahero ang modus operandi niining maong mga drayber nga dili na mag-agad sa desisyon sa tag-iya sa bagahe.

Ang estilo nga inigkanaog nimo sa barko, mosugat dayon kining maong mga badlongon dayong ilog sa imong bagahe. Dili gayod sila magpabalibad. Ikarga dayon nila sa traysikad nga gimaneho ang imong bagahe. Bisan pag modumili o mobalibad ka, ikarga gayod nila ang imong bagahe sa traysikad.

Ang nakapait kay human nila ikahatod ang imong bagahe sa taxi nga nag-parking sa unahan, mangayo na ang driver sa traysikad og dakong kantidad isip bayad sa ilang kahago sa pagkarga.

* * *

(Sumbong ug reklamo? Text sa 0910-8105522)