NBI ug fiskal

Ang pag-dismiss sa fiskaliya sa kaso nga anti-human trafficking in persons act nga gipasaka batok sa tag-iya og bar dinhi sa dakbayan, dili angay nga ikahiubos sa mga ahente sa National Bureau of Investigation.

Hinoon, angay nila kini nga himoong leksyon ug isipon nga dakung hagit alang kanila ang pagpalig-on pa sa kaso nga ipasaka nila batok sa mga tagdumala og bar nga malambigit og prostitusyon.

Ang "registered owner" sa Steve's KTV Bar nga si Jocelyn Raco ingon man ang supervisor sa mga GRO nga si Grace Guisando gipasakaan og kaso sa NBI tungod sa paglapas sa Republic Act 9208.

Ang inquest prosecutor nga unang mihimo og pagtoon sa gipasakang kaso sa NBI wala makakita'g basihan nga isang-at ang kaso sa hukmanan batok nila ni Raco ug Guisando.

Apan dihang gisubli kini pagsusi sa reviewing prosecutor, ang babayeng prosecutor mihukom nga pasakaan ang duha ka kaso tungod kay nakalapas sila sa balaod.

Dihang giendosar na ang mga dukomento sa kaso ngadto ni city prosecutor Nicolas Sellon aron papirmahan, giusab ni Sellon ang hukom sa reviewing prosecutor.

Si Sellon mismo ang mihimo og resolusyon nga ang pasakaan lang og kaso mao ra si Guisando tungod kay wala g'yoy bisan gamay'ng basihanan nga si Raco malambigit sa kaso.

* * *

Ang argumento ni Sellon mao ang lagda nga gilatid sa section 10 (e) sa Republic Act 9208 nga mahimo lang malambigit sa kaso ang mga tag-iya ubos sa tulo ka basihanan.

1.) Kon sila nalambigit gayod sa paghimo sa krimen.

2.) Nasayod ug mihatag og pagtugot.

3.) Kapakyas nila pagpugong nga mahimo ang salaod.

Tungod sa kontrobersiya nga nahimo sa pagbaliktad ni Sellon sa hukom sa iyang reviewing officer, ako g'yod siya nga gipangutana sa iyang mga baruganan.

Kuwang g'yod tinood ang ebidensya nga maglambigit ni Raco sa maong illegal nga kalihukan.

Husto ang giingon ni Sellon nga 90 porsiyento sa katawhan dili gayod motoo nga ang mga tag-iya sa mga bar walay kalibotan sa gihimo sa ilang mga floor managers.

Apan unsaon man god nga balaod man ang basihan. Ako dugay ra nga nakadungog nga ang pipila sa mga dancers sa Steve's KTV pwede nga mahaylo og salapi alang sa "date."

Pero bisan og unsa pa ka daku ang imong katahap, dili kini makabarog isip ebidensya nga makapasustiner sa kaso diha sa hukmanan.

Ang NBI mipalig-on unta sa ilang kaso batok ni Raco pinaagi sa paghimo og surveillance report nga makadaghan na sila maniid diha ug nakita gayod nila si Raco nga maoy nangunay sa pagsuperbisar sa operasyon.

O kaha bisan og sa pamahayag na lang sa pipila ka babaye nga magpamatuod nga si Raco nasayod sa mga illegal nga binuang sa maong balay patigayon.

Apan wala gayod kini malakip sa pamahayag sa mga babaye.

* * *

Nasubo ko tungod kay angay man g'yod unta ilakip ang mga tag-iya apan dili pa uwahi ang tanan. Duna pay laing higayon alang sa mga higala ko diha sa NBI.

Matud sa panultihon, better luck next time. Tambag nako ninyo mga higala sa NBI, ayaw kamo kaluya. Himoa ninyo kini nga dakung hagit sa pagpalig-on pa sa umaabot ninyo nga kaso.