Solomonic decision

Kwestiyonable ang resolution sa Cebu City Prosecutors Office nga nag-abswelto sa tag-iya sa Steves KTV gikan sa kasong paglapas sa Anti-Trafficking in Persons tungod kay taphaw ang ilang basihanan pagbasura sa kaso.

Si city prosecutor Nicolas Sellon miabswelto ni Jocelyn Raco ang rehistradong tag-iya sa Steves KTV tungod kay matud pa way ebidensiya nga duna siyay kasayuran sa illegal nga kalihukan sud sa iyang establisamento. Gawas niini wa kunoy ebidensiya nga nagpakita nga napakyas siya sa pagbadlong niini ingon man way ebidensiya nga iya kining gitugotan.

Hinuon maoy gipiit ni Sellon ang floor manager nga si Grace Guisando ug mao lay bugtong gipasakaan og kaso didto sa korte. Wa ko magtoong way kabangkaagan si Sellon sa balaud tungod kay lahi ang akong pagkaila kaniya kaniadto. Apan tungod sa iyang gihimo miturok ang akong pagduda nga dunay milagro nga nahitabo sa maong kaso.

Di man tingali lisod sabton nga kon unsay mga panghitabo sud sa establisamento nga imong gipanag-iya duna gyuy pagtugot gikan nimo. Gawas lang tingali og imong gipaabangan.

Apan sa sitwasyon sa Steves KTV sila si Raco maoy nag-operate niini. Busa lisod toohan nga wa siya masayod sa illegal nga kalihukan sud sa maong bay patigayon. Gawas pa nganong ang manager ra maoy giduot nga kon buot sabton igo lang kining nagtuman sa mando sa iyang amo nga mao si Raco.

Imposibli man sab nga si Guisando nagbuot buot sa mga kalihukan sa club nga wa masayod ang tag-iya, diba? Busa dako ang akong pagduda nga dunay nakasapi sa maong kaso.

Unsay akong basihanan sa pagduda? Daghan; Una, mao nga tulo ka mga resolution ang gibuhat sa piskaliya sa maong kaso. Ang unang resolution gihimo ni piskal Jesus Feliciano nga nagbasura gyud sa kaso batok nila ni Raco ug Guisando.

Ang ikaduhang resolution mao ang iya ni piskal Aida Sanchez nga mi-reverse ni Feliciano ug mirekomendar nga ipasaka gyud ang kaso didto sa korte. Samtang ang ikatulo ug maoy final nga resolution mao ang iya ni Sellon mismo nga nag-abswelto na ni Raco ug mipasaka og kaso batok ni Guisando.

Si Sellon gikatahong napugos paghimo og compromise tungod kay matud pa sa tinubdan sa Lintunganay nga nanghasi si Feliciano human masayri nga gi-reverse ni Sanchez ang iyang resolution.

Si Sanchez maoy reviewing prosecutor dinhi sa dakbayan sa Sugbo.Ambot og nganong nasuko si Feliciano, siya ra gyuy nasayod. Apan gi kalikayan ang mga pagduda nga dunay binuang nga nahitabo sa iyang pagrekumendar nga ibasura ang kaso.

Ambot og matawag ba nga "Solomonic decision" ang gihimo ni Sellon nga pagbahin sa mga respondents sa kaso sa iyang final nga resolution o nagpakita ba ni nga lakip siya apil na pod sa mga tinunto sa iyang mga sakop.

Kon napasaka ang kaso batok sa mga manager ug tag-iya sa laing mga club nga gipangronda sa NBI way rason nga di mapasaka ang kaso batok ni Raco.

Mas maayo siguro nga tan-awon sa ni regional State Prosecutor Antonio Arellano ang maong kaso kay nagduda gyud ko nga dunay mga nakasapi sa maong kaso. Pastilan, paita sa sistima sa hustisya sa atong nasud kon mao ni dunay mga piskal nga di matinud-anon sa ilang trabaho paghatag og hustisya.

Kaluoy sa mga biktima sa prostitution diha sa Steves KTV bar nga gipahimuslan ang ilang pagkababaye ug kadungganan apan ang tag-iya sayon ra kaayong makalingkawas sa kaso.

* * *

[email protected]