Gun handling seminar

Tinuod g'yod ang panultihon nga bisan og duna ka pa'y armas dili kini garantiya nga malikayan nimo sa tanang higayon ang hulga kon dunay magtinguha pagpatay kanimo.

Apan bisan og dili kini garantiya nga magamit nimo ang armas pagpanalipod sa kaugalingon sa tanang higayon, apan mas maayo na lang nga duna kay magamit kon gikinahanglan.

Tukma kaayo ang baruganan nila ni Regional Trial Court judges Gabriel Ingles ug Meinrado Paredes nga wala sila'y tinguha nga maghupot og armas human gipatay ang ilang kaubang huwes.

Si judge Henrick Gingoyon, usa ka Sugboanon apan atua maghuwes sa kaulohan, gipatay kaniadtong miaging adlaw sa wala pa hiilhi nga tawo.

Ang natural nga reaksyon sa uban mao nga kinahanglan g'yod kuno nga ang mga huwes magdala na og armas. Sama ra kini sa awhag nga ang media tugotan sab nga makabaton og armas.

Akong balikon nga bisan dili ka pa sakop sa media ug dili ka pa huwes, makahimo ka paghupot og armas basta mo-qualify ka lang sa mga requirements.

Sa akong bahin, qualified unta ko nga mohupot og armas, apan tungod sa kamahal sa kantidad sa 45 kalibre nga pistola nga maoy dugay na nakong gipangandoy, wala g'yod tawon.

Mao na nga kon maglakaw na gani ko - o kaha naa ko sa gawas - gamiton nako ang akong nakat-onan sa diha pa ko madistino sa kapolisan, ang counter-surveillance.

* * *

Alang sa mga tanod, ayaw mo pagpatuga-tuga og dala'g armas nga dili mo maantigo mogamit, labaw na kon wala mo masayod kon anus-a kini tukmang gamiton.

Ang armas dili para panghambog nga aron ingnon nga naay nagbagal sa inyong hawak. Sagad ra ba sa inyong mga armas walay lisensya.

May reklamo ko nga nadawat kagahapon. Usa ka tanod sa barangay Basak-San Nicolas gisaway pag-ayo sa mga lumulopyo sa dalan Cabreros.

Dunay usa nila ka silingan nga si Junjun Tuico, civilian employee kini sa Mandaue City nga nadistino sa Mandaue City police office.

Gitabangan kini'g kulata sa mga batan-on nga giingong sakop sa Alpha Khappa Rho. Si Junjun nag-atang og kasakyan nga traysikad sa eskena Cabreros aron mohatud kaniya sa highway.

Gipareglahan hinoon sa mga bugoy. Gitionan siya'g armas. Pagkakita ni Junjun sa usa ka tanod, gisumbong nga ang batan-on dunay armas.

Nahibulong si Junjun kay wala man dakpa. Paglikay sa kagubot, milakaw si Junjun, apan gigukod kini sa maong batan-on nga duna nay mga kauban.

Gikulata siya. Matud sa mga nakakita, natagbaw g'yod og kulata ang mga Akrho kang Junjun. Miabot na sab ang tanod, ug si Junjun hinoon ang gigunitan.

Nakahigayon hinoon pagkulata ang mga Akrho. Mihulbot kini sa iyang armas dungan sa pagbadlong, apan wala mopasalba.

Maayo na lang kay dihay tawo nga dunay lisensyadong armas nga maoy mipasalba, ug nakapadagan sa mga Akrho. Magpatuga-tuga gani ta'g dala'g armas, kinahanglang makamao ta mogamit.

* * *

Congrats diay sa akong higala - si Koronel Vic Loot. Sa dili madugay mahimo na gayod siya nga senior superintendent - ranggo nga katumbas sa full-pledged colonel diha sa military.

Gawas nga senior na kaayo si Loot ug angayan na nga mahimong senior superintendent, gilatid sa section 32 sa Republic Act 8551 nga ma-promote siya sa ranggo.

"Any PNP personnel designated to any position whose rank is lower than that which is required for such position shall, after six months of occupying the same, be entitled to a rank adjustment corresponding to the position."