Mantsa sa atong dungog

Minilyon ka pisos ang gigasto sa atong gobyerno aron pag-host sa 23rd South East Asian Games. Bisan sa kahagip-ot sa panudlanan sa atong gobyerno gipaningkamutan niini nga mamahimong mabulokon ang kalihukan dinhi sa nasud aron makakuha og pagdayeg gikan sa international community.

Usa sa mga tumong ug tuyo sa atong pag-host sa duwa ug sa atong paggasto og dakong kantidad mao ang pag-promote sa atong nasud. Apan nakab-ot ba ang atong tumong? Worthy ba ang atong nagasto sa publicity nga atong nakuha?

Sa akong tan-aw, pakyas ta sa atong paningkamot nga makuha ang maayong publicity ug sa pag-promote sa atong nasud atubangan sa international community kini tungod sa mga bati nga mga report nga migawas sa atong pag-host sa mga duwa.

Una gipasanginlan ta nga nanikas sa mga duwa hinungdan nga ang Pilipinas maoy nag-una sa medal standing sa nagpadayong torneyo. Ang Primero Ministro sa Thailand nga si Thaksin Shinawatra maoy namasangil sa atong pagpanikas. Usa ka insulto nga angayang di palabyon sa atong gobyerno.

Ang pasangil sa pagpanikas angayang ika-alarma di lang sa atong mga opisyal kon dili natong tanang mga Pilipino tungod kay dako kini og implikasyon sa integridad natong atubangan sa international community.

Posibling ang pagtan-aw sa mga silingan natong nasud sa Asya mao nga ang mga Pilipino mga tikasan gyud. Ang grabing media attention nga nakuha sa eskandalo sa atong politika taliwala sa mga pasangil nga nidaog sa pagpanikas ang atong presidente posibling usa sa mga nagtukmod ni Shinawatra pagtoo nga lakip sa mga duwa sa SEA Games ato pong gitikas hinungdan nga kita maoy nag-una sa medal standing.

Dili ba dako kining kauwawan natong mga Pilipino? Laing rason nganong nakaingon ko nga pakyas ta sa publicity nga ato untang gitinguha mao ang giingong reklamo sa mga atleta sa ilang accommodation ug sa gikatahong food poisoning dinhi sa Sugbo sa mga atleta sa Vietnam.

Gihimakak na hinoon ang maong mga report apan nakamugna na kini og kadaot sa atong imahin. Gawas niini, wa sab mauyoni sa simbahan ang luho nga opening nga atong gihimo dinhi sa Sugbo.

Si Arsobispo Ricardo Cardinal Vidal misaway sa minilyon ka pisos nga atong giusikan alang sa fireworks display atol sa opening tungod kay matud niya angayan kining gihatag sa mga pobre.

Nindot paminawon ang pamahayag sa cardinal apan mas may kahulogan kini kon gihimo pa sa simbahan ang buot ipasabot ni Cardinal Vidal.

Way nawong si Cardinal nga mosudya niini ngadto sa atong gobyerno tungod kay ang simbahan maoy nagpasiugda sa mga luho nga kalihukan. Suma kon mogasto ang simbahan og mga pista di ba labaw pa man pod kini ka luho?

Hilas rang paminawon ang simbahan ug alang nako usa ka pagpakaaron ingnon ang pagsaway sa gobyerno sa paggasto og dako alang sa SEAG inay nga ipakaon sa mga kabus tungod kay wa ko kakita sa ihimplo sa simbahan sa pagmahal niini sa mga pobre.

Timailhan niini mao ang ilang paghimong negosyo sa mga sakramento nga angayan untang libre nga ihatag sa simbahan tungod kay ila kining obligasyon. Pananglitan, ang pagmisa og patay sa dili pa kini ilubong.

Hain na man ang pagpangga sa kabus kon ang mga pari, pwera lang sa maayo, di mo misa sa patay kon di kabayad ang tagtungod. Dili lang kay kini ra, gihimong negosyo og maayo sa simbahan ang mga pampublikong sam-ang.

Gawas niini, ang pagbunyag ug pagpakasal dili ba angayan man unta nga libre sad, pero unsa may nahitabo karon kon wa kay ikabayad di gyud kabunyagan ang imong anak ug di sab gyud mokasal ang simbahan kon di kang kabayad.

* * *

[email protected]