EDITORYAL – Unsaon pagpamenos sa presyo sa gasolina

Ang mga tag-iyag sakyanan, pribado ug pangpubliko, nagpunayg reklamo sa nagpadayong pagsaka sa presyo sa gasolina.

Tuod man, walay hunong ang pag-usbaw sa presyo niining labing importanteng sugnod sa mga sakyanang demakina ug morag walay mahimo ang publiko - bisan pa gani ang gobyerno - sa pagpahunong sa maong nagpadayong saka sa presyo.

Si Federico D. Pascual Jr., usa sa mga respetadong kolumnista sa The Philippine Star, adunay sugyot kun unsay maayong buhaton sa mga tag-iyag sakyanan aron mapugos ang mga dagkong oil companies sa pagpaubos sa ilang presyo.

Mao kini ang sugyot ni Mr. Pascual:

Ayaw pagpalit og gasolina sa duha ka dagkong langyawng kompaniya sa lana kun oil companies. Adto palit sa Petron o kaha sa mga gagmayng player sama sa SeaOil, Total, etc.

Kun kining duha ka dagkong oil companies walay kabaligyaan sa ilang gasolina, mapugos kini sa pagpa-us-os sa ilang presyo. Ug kun mopa-us-os sila, ang ubang kompaniya mosunod usab sa pagpamenos sa ilang presyo.

Ug kini, suma pang Mr. Pascual, moresulta sa "price war" kun kompetisyon sa pagpamenosay sa presyo sa gasolina. Ang mabulahan niini mao ang mga tag-iyag sakyanan.

"To have an impact," matud pa ni Mr. Pascual, "we have to reach millions of these two oil companies' gas buyers. Let us spread the word about this boycott."

Nindot ang sugyot sa atong Star columnist. Sa teyoriya, epektibo gyud nga makapugos sa mga dagkong oil companies - nga maoy nagkontrolar sa negosyo sa lana dinhi sa nasud - sa pagpakunhod sa ilang presyo.

Apan nagkinahanglan kini og halapad nga kampanya ngadto sa mga tag-iyag sakyanan diin kombinsihon kini sa pagsagop sa suhestiyon ni Mr. Pascual.

Kon matigayon kini hayan mahunong na usab ang walay puas nga welga sa mga drayber sa PUJ kinsa kanunay nalang "mosilot" sa publiko pinaagi sa transport strike kay lagi mahal ang gasolina.