Tan-awa, nasayop ba ko?

Tan-awa og unsay gidangatan? Gawas nga misaka ang presyo sa atong mga palaliton, bayranan sa koryente, ug hayan apil pa gani ang tubig, karon naglaraw na usab ang mga transport operators nga mangayo na usab sila og umento sa plete.

Kining tanan maoy epekto sa pagpatuman nianang expanded value added tax nga gideklarar nga constitutional, wala kuno makalapas sa atong batakang balaod, apan hinay-hinay nga mokulob sa kaldero sa kinabag-ang mga kabus.

Tinuod, si director Rodolfo Cabulao sa Department of Labor and Employment miingon nga hayan nga ang Regional Tripartite Wages Productivity Board mopatuman og laing umento sa sweldo.

Apan ang pangutana, kanus-a pa man ang pagpatuman og umento? Pila man usab ang umento? Kon dunay ipatuman nga umento, sinsero ba ang kadagkoan sa Department of Labor nga mopatuman niini ngadto sa tanang magpapatigayon?

Kon ibutang nato nga ang mga magpapatigayon motuman sa kamandoan nga umentohan ang sweldo sa ilang mga kawani, makasugakod kaha sila nga dili na hinoon makapanira ang ilang mga negosyo?

Ambot og nakasabot ba kaha kamo kanako. Mora ko og plakang buak nga nagbalik-balik pagpasabot, apan ang atong mga magbabalaod, apil na ang mga justices sa Supreme Court, mipaluyo sa pagpatuman sa Evat.

Nakasabot ko nga gihukman sa Supreme Court nga legal ang pagpatuman sa Evat tungod kay kon dili kini buhaton, maut-ot ang atong panudlanan ug ang mga langyaw'ng tigpahuwam dili na mosukol sa Pilipinas.

Kay matan-aw man nila nga wala kini'y paagi nga mosaka pagbalik ang pundong salapi sa nasud. Sa pagpatuman sa Evat, diritso g'yod hinoon nga makakwarta dayon ang kagamhanan nga dili na magpatulo og singot.

Wala gayod nila huna-hunaa nga daku usab unta kaayo ang buhis nga makolekta kon ang mga negosyante nga wala magbayad og buhis maoy atong pugson sa pagbayad og buhis.

Tingali kining maong mga kongresista nga mihukom sa pagpatuman og dugang value added tax malipay nga magsud-ong nga daghan sa ilang mga lumulopyo ang mag-ilaid sa grabeng kagutom.

Tan-awa ra god og pila'y usbaw sa mga baligya? Kaniadto dunay pan nga sagad nako paliton sa silingan namo nga tindahan sa Gaisano diri sa V. Gullas, ang presyo tag P18. Karon abi ninyo og pila na, P25.

Ang mga delata nga sardinas nga kaniadto makapalit ka lang og kapin sa P6 dunay kapin sa P7, karon gibaligya na sa tag P9 ug may kapin sa P10 ang lata.

* * *

Ako na lang pabantayon daan ang kapolisan kay nagtoo g'yod ko nga pipila ka adlaw gikan karon mosaka ang crimes against properties sa bisan diin nga dapit sa nasud - ilabi na sa mga dagkong dakbayan sama sa Sugbo.

Dili malikayan nga ang mga tawo nga mahutdan na g'yod sa ilang makaon, makahuna-huna na lang sa pagpanulis ug pagpangawat aron makakwarta og masulbad ang ilang kagutom.

Maayo og ang ilang tulison mao ang mga druglord kay dili kaayo kita malooy, apan dili imposible nga ang mga mabiktima sa pagpanulis mga yano lang nga sumasakay sa mga jeepney.