Kining mga mangunguot

Kining mga mangunguot nagpadayon sa pagdagsang karon sa dakbayan sa Sugbo. Kon maglakaw ka sa mga aseras, ilabi na sa mga dapit diin anaay daghang tawo, anaa usab ang mga badlongon sa katilingban nga naghulat lang sa tukmang tayming sa pagbiktima kanimo.

Partikular kining mahitabo diha sa Colon area. Kanang lugara dansohanan kaayo sa daghang mga tawo. Pero dili ka angay mokompiyansa sa imong paglakaw nianang lugara kay dili ang tanang mga tawo nga imong makita nianang dapita mga maayog kabubut-on. Aduna usay mga tul-id og tinai.

Ang paboritong biktimahon sa mga mangunguot nianang dapita mao kadtong mga tawo nga magdala og bag nga ikalibhay sa abaga. Ila kining sundan ug sa higayon nga makatayming na, ablihan nilag hinok ang bag nga dili gayod madiparahan sa nagkalibhay niini. Kuhaon nila ang tanang valuables nga sulod sa bag.

Aduna usay ubang mangunguot diha sa Colon area nga sundan ka hangtod sa eskina diin may labanganan paingon ngadto sa pikas tampi sa karsada. Samtang ikaw naghulat sa pagsiga sa green light nga alang sa mga tawo, wala ka lamay kasayoran nga may kiriwan na og kamot nga nagbarog sa imong luyo nga mihinok sa pag-abli sa imong bag o ba kaha sa pagkuot sa imong bolsa.

Usahay usab anha mahitabo ang pagpanguot atol gayod sa paglabang sa prospect sa pedestrian. Mahitabo kini ilabi na kon daghan ang mga tawo nga molabang sa pedestrian. Monunot sa bul-og sa mga tawo ang mangunguot aron sundan ang iyang prospect. Tungod kay anad na siya niining buhata, dili siya madiparahan sa iyang prospect sa iyang pagpanguot.

Pagbantay kamo niining maong klase sa tinonto kay daghan na kaayo ang nabiktima niini.

* * *

Sa laing bahin, may text akong nadawat gikan sa usa ka magbabasa nga nagsumbong nga sulod sa mga mall may mga mangunguot nga nag-operate. Ang iyang text nagkanayon:

"Good day. I just want to share this with you, Sir, so you can help our authorities inform the people that there are pickpockets operating in one of the malls here. My lady friend was one of the victim. It happened last Sunday (September 25, 2005). Her wallet containing cash and important cards and receipts was taken from her bag." -- 0916-7998765 (September 27, 2005 -- 15:57:48)

* * *

Sumbong ug reklamo? Text sa 0910-8105522)