Kaila kaayo ko ni Judge Dumdum

Karon, daghan na gyud kaayo ang nakaila ni Judge Simeon Dumdum, Jr. Kini, dili tungod sa iyang pagka-judge, kay naa may daghang judge nga waa kaayo mailhi. Dili sad tungod sa iyang pagka-Executive Judge, kay daghan kaayong executive judge sa tibuok nasud, ug mora lag waa nato.

Ug di sad tungod ni Gingging, iyang asawa nga guwapa kaayo ug mas bright pa kay ni Jun, kondili tungod gyud sa iyang pagka-tawo.

Mao ni ang mahinungdanon sa tawo. Kinahanglan di ka magsalig sa imong kwarta, di magsalig sa imong position, ug di magsalig sa imong ka-guwapo o ka-guwapa lang. Of course, makatabang kaayo ni nimo, pagtuboy sa imong image ug sa imong garbo.

Apan, temporaryo lang ning tanan. Maoy hinungdan nga kon ngil-ad ka nga pagkatawo, kon di ka parehong Jun Dumdum, ug ni Gingging, inigka-waa sa salapi, inigka-waa nimo sa gahom, waa nay molingi nimo, Dro. Busa, importanti gyud kaayo ang imong pagka-tawo mismo. On top sa imong kwarta ug gahom.

Ako bitaw, sukad waa man gyud ko kagunit og daghang kwarta, ug tapus kita hinginli ni Cory sa atong pagka-Asst. Regional Director sa Department of Public Information (ambut unsay akong saa), duna man gihapoy molingi ug motagad nako karon, labina ang mga kanhi driver, kanhi janitor ug mga ordinaryong empleyado kanhi atong mga kauban sa department.

Anyway, nakaila kaayo ko ni Judge Dumdum. Kini tungod kay dugay ming nagkauban sa DPI. Siya ang sinaligan ni Regional Director Godo Roperos kon panuwat nay hisgotan. Mao man gani tingali ang hinungdan ngano nga waa kaayo siya dugaya pagsugot ni Gingging.

Apan, on top niini, ang iyang pagka-tawo mismo. Ang iyang attitude towards work. Ug tungod kay man of letters, continuing ang iyang pagbasa ug pagtuon.

Kada-sulod nako sa iyang opisina karon, maoy akong maabtan nga sigeng basa, sigeng tuon. Usahay maabtan sad nako si Gingging. Ug maghandum dayon mi sa among mga kagahapon uban sa DPI ug sa Office of Media Affairs.

Ug tungod kay nakaila kaayo ko ni Jun, waa ko mahibong sa iyang pagdaug sa "Best Decision Award" sa mga kaso kriminal sa tibuok nasud.

Mao nga Jun ug Gingging, late na man nig gamay, Congratulations. Bintaha gyud nig maka-asawa tag mas bright nato da, di ba, Dro? Tan-awa sad ko o!