EDITORYAL - Naghitak ang tanang matang sa krimen

Sa iyang binasang kolum "Iyo Antoy" kagahapon, si Ginong Antolin de la Serna nagkanayon: "Ambut naunsa na ning kalibutan karon. Grabe na kaayo ang mga kasal-anan nga nahimo. Wa nay tagad sa Ginoo...Mao nga naghitak na karon ang tanang matang sa krimen nga di nato ma-imagine nga mahitabo."

Bitaw. Husto si Ginong dela Serna.

Niadtong panahona, duna ba guy amahan nga molugos sa iyang kaugalingong anak? Duna ba guy mga child prostitutes? Duna bay panghold-ap? Duna ba adis-adis? Et cetera.

Kaniadto daghang mga batan-ong lalaki ang magsuroy-suroy sa halawom ang takna sa kagabhion aron mangharana. Wala kini mahadlok nga tripingan sa mga abusadong sakop sa notoryus nga fraternity.

Kaniadto sab walay magbinuang sa imahen sa Mahal nga Birhen. Karon ipanglabay na.

"Asa man ta paingon ini?" nangutana si Antolin. "Mora mag nagka-Godless society na ang atong nasud. Waa nay tagad sa moralidad. Waa nay relihiyon. Maoy hinungdan nga sayon na kaayo alang kang Satanas ang pagkabig kanato."

Nganong naingon ta niini karon? Nganong nagkalig-on ang gahum ni Satanas?

Kaniadto gud ang atong Simbahan magpahigayon og katekismo sud sa simbahan matag Domingo. Ug duna pa gyuy mga katekistang mopahigayon og katekesis sa mga eskuwelahan.

Kaniadto sab dunay subject sa mga lower grades sa mga eskuwelahan nga gitawag og "Character and Conduct" diin ang mga bata gitudloan sa maayong pamatasan. Wa na ni ron.

Matabang pa tingali ang situwasyon alang sa umaabot nga mga henerasyon kun ibalik ang katekismo sa simbahan ug ang "Character and Conduct" sa mga eskuwelahan.