Kon ma-proven husto si Clavel, what?

Nagdagan pa ang panahon. Waay hingpit nga nasayod kon unsay linugdangan ning tanan. Sumaa sa mga survey, ang gihimo sa House of de Venecia nga pagbasura sa impeachment complaint batok sa Presidente, waa makatubag ug waa maka-resolbar sa mga charges nga giitsa ngadto sa Malacañang.

Ang tanan naghulagway lang gyud nga mas daghan pa ang mga tigpanalipod ni Presidente Arroyo diha sa House of de Venecia. Mao ra gyud ni ang nahimo sa mga Gloria loyalists sa Kongreso.

Ug tungod kay naglakaw pa man ang panahon. Daghan pa ang mga mahitabo between now and tomorrow. Kon kanus-a kutob kining atong mga anxieties ug uncertainties, waay nasayod.

Ang desisyon sa House of de Venecia, nakapasamot hinuon sa mga pagduda, ug alang sa mga nag-alagad sa lungsod, makababag kini sa maayong pagpangagamhan. Kay under the cloud of doubt, dili nato maangkon ang 100 percent nga pagsalig ug pagpaluyo sa katawhan nga gialagaran.

Mao nga unta, kon nakahatag pag hingpit nga katin-awan ang House of de Venecia sa mga isyo nga ato karong giatubang, kon namatud-an gyud beyond reasonable doubt nga nagpasagad lang ang oposisyon, waa na unta tay problema ron. Husay ug hapsay na unta karon ang tanan.

Di nato mapasangil ang uban pagdangop sa pagprotesta tungod kay alang nila, waa sila matagbaw sa desisyon sa House of de Venecia. Sa ato pa, padayon ang atong pagkatibulaag. Dimalas ang atong nasud, ang atong mga lider di magkasinabot.

Karon kon pananglitan, mamatud-an sa kaulahian nga husto ang gibuhat ni Congresswoman Martinez, unsa man? Atong i-declare ang ubang mga Kongresista nga persona non grata? Dili sayon ang gihimo ni Clavel. Usa ka heroic act alang sa iyang mga dumadapig. Apan, treachery alang sa iyang mga kaatbang.

Maunsa man, dili lalim ang iyang gibuhat. Kon mamatud-an siya later nga husto ang iyang gibarugan, makaingon ta nga panglungsod gyud ang iyang gihimo. Ug ang ubang mga Cebu lawmakers, unsa man? Panglungsod sad?