Unsay nakalangan...?

Mokapin na sa duha ka buwan sukad masunog ang warehouse sa Cebu Ports Authority nga gigamit isip bodega sa Bureau of Customs, apan hangtud karon wa pay resulta sa imbistigasyon nga gihimo sa mga ahensiya sa gobyerno nga mihimo og pakisusi pagsuta og arson ba ang maong hitabo.

Daghan ang mga ahensiya nga nag-imbistigar niini gawas sa Bureau of Fire Protection nga maoy dunay mandato sa paghimo og imbistigasyon duna say National Bureau of Investigation nga gihangyo ni collector Lourdes Mangaoang paghimo og imbistigasyon.

Kini gawas sa task force usab nga giumol ni General Nestorio Gualberto ang hepe sa customs police sa tibuok nasud diin gilangkuban ni sa mga sakop sa Criminal Investigation and Detection Group.

Sa kadaghan sa mga grupo nga nag-imbistigar niini, wa pay labot sa team sa BFP gikan sa Manila nga nangabot dinhi sa Sugbo, hangtud karon wa pa gyud moy nahimo?

Kanunay'ng gihimong rason sa NBI nga wa pa kunoy imbentaryo sa mga butang nga didto sud sa warehouse nga gisumeter ang customs. Gawas niini maglisod sab ang mga imbistigador pagsud sa nasunog nga bodega tungod sa kahadlok nga mahugno kini ug matabonan ang mga imbistigador nga mosud aron sa paghimo sa imbentaryo.

Unsay nakalangan sa customs pagsubmitir sa inventory ug unsay nagpugong nila pagguba sa nasunog nga warehouse aron mapahigayon na ang imbentaryo? Wa kong kasabot og nganong inutil ang daghang ahensiya nga nag-imbistigar niini.

Nunot sa kalangan sa resulta sa imbistigasyon,misamot hinuon karon ang pagduda nga tinuyo gyud ang maong sunog aron pagtabon sa dakong anomaliya diha sa aduana. Ang pag-umol og daghang grupo nga moimbistigar sa kaso hayan paagi sa mga kukhan nga opisyal diha sa customs aron lawgawon ang imbistigasyon ug tabonan sa dayon ang pagpangahanaw sa mga butang diha sa warehouse.

Nganong di ipaguba sa customs ang salin sa nasunog nga warehouse aron mapahigayon ang imbentaryo? Ug nganong di sila mosumitir og imbentaryo sa mga butang nga didto sud sa warehouse.

Nganong di sab interesado ang mga imbistigador sa pagsulbad sa maong kaso? Ayaw ko'g ingna nga lakip sila naareglo na?

* * *

Congratulations ni kanhi NBI Central Visayas regional director Reynaldo Esmeralda sa bag-ong promotion nga iyang naangkon. Si Esmeralda usa na karon ka full-pledge regional director. More power Sir!!!!

* * *

[email protected]