Load sa text scam

Niining bahin sa akong lindog, tugoti nga akong hatagan og luna kining usa ka text nga akong nadawat gikan sa usa ka magbabasa. Ang iyang gisumbong kanako bahin gihapon sa text scam diin patuohon ang prospective victim nga tag-iya og cellphone nga nakadaog siyag load.

Lahi kini sa ubang modus sa load nga ato nang nahisgotan dinhi. Mao nga atong tubayan kining iyang text. Miingon siya: 'Good day. Usa pod ko sa nakasinati nianang bahin sa text scam. Nakadaog kuno ko og load worth P500.00. To claim the prize, i-type lang kuno nako ang number nga 0921-7660150 and three times send it to 808, which means, Pasaload."

Ang akong ikasulti mao nga kadudahan gyod nga adunay nagpaluyong binuang niini. Una, kon ang numero nga 0921-7660150 mao ang nagpadala kanimo sa pahibalo nga nakadaog ka, buot bang ipasabot nga siyay mohatag sa load nga imong nadaog?

Ikaduha, nganong sa 808 man ipadala og katulo ang gi-type mo nga 0921-7660150? Tinuod, sa pasaload kana nga numero. Busa kon mo-type ka sa natumbok nga cellphone number ug unya ipadala sa 808, mora na gyod og Pasaload ang sistema.

Ang nakalahi lang niini sa pasaload kay human ma-type ang cellphone number, i-type man sab nimo ang amount sa load nga imong ipasa una i-send ngadto sa 808. Pero sa imong na-experience, wala man nimo isaysay kon gipa-type ka ba usab og amount human sa cellphone number.

Pero aron makalikay sa ilad, mas maayong dili gayod motuo sa bisan unsang congratulatory message nga madawat. Nagtuo ko nga dako ang posibilidad nga usa gayod ka nature sa text scam ang imong nadawat.

"Ang akong tubag mao ni: Ayaw og sigeg pangilad, uy! Unya akong gitawagan. Ni-ring. Pero wala madugay, na-off ang iyang cellphone," nagkanayon ang atong texter nga tag-iya sa numero 0918-4286130

Sakto ang imong gibuhat. Tungod sa iyang pag-off sa iyang cellphone dihang imong gitawagan, mas modako ang atong pagduda nga binuang gayod kadtong iyaha. Tungod kay nabuking man ang iyang modus operandi maong gi-off na lang niya ang iyang cellphone.

Mao nga ayaw gyod mog kompiyansa. Kon makadawat kamog text nga ingon niini, ayaw ninyo patoli. Ang mga mangingilad mohaylo sa pagtanyag sa mga oportunidad nga dili katuohan ug daw layo ra gayod sa kamatuoran. Ingon gayod niana ang sistema sa pangilad. Kay wala man usay mailad kon dili tinuod nga makahaylo ang itanyag nga oportunidad.

Busa, pagbantay gayod kamo kanunay...!

(Sumbong ug reklamo? Text sa 0910-8105522)