Ang sinugdanan sa Banat News

Ang Banat News nahimugso niadtong Agosto 23, 1994, wa pay usa ka semana human si Joselito "Jiji" F. Gullas ug Juanito V. Jabat naghisgut-hisgot nga mosuway'g mantala og usa ka tabloid publication sa pinulongang Binisaya ug Iningles.

Ang orihinal nga plano mao nga kopyahon ang estilo sa mga popular nga tabloid sa Amerika sama sa Weekly World News, National Enquirer, Globe ug Examiner diin atong mabasa ang mga kahibulongang butang ug hitabo.

Mao nga sa mga sayong isyu sa BN adunay mga artikulo bahin sa usa ka tawo nga dunay duha ka buok diha, bahin sa pagbitay kang Satanas, bahin sa usa ka lalaking may gitas-ong dos piyes (2 feet) lang apan naminyo sa babayeng six-footer, etc.

Apan ang maong matang sa mantalaan wala mo-klik sa mga Sugbuanong magbabasa bisan pa nga ang gisundogan nga mga tabloid halinon kaayo sa Amerika.

Busa ang duha ka founder niini -- si JFG ug JVJ -- medesider na lang sa pag-usab sa estilo ug pormat sa Banat News diin gihimo na lamang kini nga tabloid newspaper sama sa mga tabloid gikan sa Manila nga gibaligya sa atong mga newstands. Giuyonan sab kini ni Sir Dodong Gullas, ang tag-iya sa The Freeman.

Ang maong kausaban gihangop sa mga magbabasa ug diha magsugod ang pagsaka sa sirkulasyon ning maong mantalaan.

Unang Staff

Ang unang staff sa Banat News gilangkuban nila ni J.V. Jabat, editor-in-chief; Beverly Lumosad, associate editor; Homer Sayson, sports editor; Rene Elevera, artist.

Si Rene U. Borromeo maoy labing unang reporter ug siya maoy tagsulat sa labing unang banner story sa BN.

Si Kriss Relatado, Tessie Sevilla ug Ann Las Cruces maoy unang naghatag og kinabuhi sa estertainment section. Nagpadayon pa sila nga sakop sa BN family gawas ni Tessie nga mipanaw na.

Ang labing unang serialized novel maoy tagsulat si Leo Lastimosa.

Kini sila maoy nakatabang og dako sa pagpa-takeoff sa Banat News sa bisan hinay-hinay lang nga paagi apan kanunay.

(Kabahin sa mga unang tigtampo sa Banat News og mga sugilanon, palihog basaha ang artikulo ni Quir L. de Gracia dinhi sab ining isyuha.-- EDITOR)

Nagkalig-on

Nagkalig-on na karon ang Banat News sa iyang ika-onse ka tuig nga pag-alagad sa katawhan.

Nagkalig-on ug magkalig-on pa gyud kini, karon nga nahisakop na sa prestihiyosong The Philippine Star Group of Publications.

Kusganong giduso ngadto sa unahan ang Banat News ni Sir Miguel G. Belmonte, ang presidente ug CEO sa Philippine Star, inabagan dinhi sa Sugbo ni Sir Melandro "Bhoy" Mendoza, general manager sa The Freeman/Banat News.

Ang circulation sa BN nisaka og kapin sa 100 percent sukad sa pagkupot niini sa Philippine Star. Ang BN nag-circulate na karon sa tibuok Sugbo, Ormoc City, Tacloban City, Bohol, Dumaguete City, Bacolod City ug Iloilo City.

Tungod niining halapad na nga area sa Kabisay-an ang naabot sa BN, mahimo nang tawagon kini nga regional newspaper.