CPPO apil diay

Nakasalmot usab diay ang mga sakop sa Cebu Provincial police intelligence ug ang Special Operations Group sa kalampusan sa National Bureau of Investigation (NBI) sa pagsikop niadtong duha ka suspetsadong tulisan sa Land Bank-Bogo.

Sayo kaayo nga nagpadala og text message kanako si Major Juanito Enguera, ang hepe sa Special Operations Group, nga nagmahay kay sa ako kunong report kagahapong adlawa wala sila mahisguti.

Buyno, unsa may makuha god nako kon dunay nakaapil nga laing police unit sa pagsulbad sa maong kaso. Mas maayo hinoon, ilabi na nga ang Bogo, ubos sa teritoryo sa kapolisan sa probinsya.

Sa akong bahin, nasayod ko nga mitabang usab ang kapolisan sa probinsya sa pag-imbistigar sa kaso, apan kon tan-awon nimo sa hulagway makita nimo nga ang duha ka dinakpang gipresentar, nagsul-ob og T-shirt nga "NBI detainee."

Ikaduha, ang among mga reporters nga nakighinabi ni provincial police director Drusillo Bolodo, wala tug-ani sa tukma nga inpormasyon. O kaha kuwang kaayo og kasayuran si Bolodo sa gihimong imbistigasyon.

Tiaw mo, pagkabasa ni Banat reporter Edwin Melecio sa kopya sa complaint nga gipasaka sa NBI batok sa mga suspetsado, nagdali-dali kini pagbakwi sa iyang report nga gibasi sa mga detalyi nga nakuha niya sa Cebu Provincial Police Office.

Kini tungod kay layo pa kaayo sa tinuod. Apan angkonon nako nga naglihok usab ang CPPO sa maong pagpanulis.

Ang pait lang hinoon huna-hunaon kay mora'g walay salig sa CPPO ang gobernador ug ang manager sa bangko nga gitulis.

Abi ninyo og ngano? Si gobernador Gwen Garcia ug ang manager sa Land Bank Bogo branch mihangyo g'yod sa NBI nga sila maoy moimbistigar sa maong pagpanulis.

Resulta, nindot kaayo ang gisangpotan kay napatug-an nila ang gwardya sa bangko nga apil siya sa mga tulisan.

Ang iyang trabaho mao ang paghatag og inpormasyon ngadto sa mga tulisan kon kanus-a nga dunay daghang kwarta nga sayon rang tulison.

Alang sa higala nako nga si Major Enguera, akong pagyukbo kanimo - dugay na ra ba nga wala kita magkita - nga angay ka usab diay nga daygon sa maong kalampusan. Mabuhay ka major!

* * *

Angay diay nga atong pul-ongan ang mga tanom nato nga "Fortune" tungod kay usa kini sa maitlogan og lamok nga makapasanay sa dengue.

Kagahapon, ang mga nurse nga nadistino sa barangay Lorega-San Miguel abtik kaayo nga nanuroy sa lainlaing dapit sa barangay. Gitan-aw nila ang mga lugar nga posibleng kapuy-an sa mga lamok og ang tagbalay gitambagan sa paghimo og paagi nga maguba kini.

Salamat ninyo ha mga nurse sa Lorega? Abi god ninyo, daghan na nga mga taga barangay Lorega ang gipanghilantan, duna na g'yoy pipila nga nadala na sa ospital og konpirmado nga natakboyan og dengue.

Lisud sab ang paagi sa department of health no? Tiaw mo, maghuwat pa diay kita dinhi sa dakbayan nga dunay mga 140,000 ka tawo nga matakboyan sa dengue usa sila modeklarar nga dunay state of calamity.

Pila na kahay mangamatay no kon ingon niana ang gidaghanon sa matakboyan og dengue?