Pantalan ug aseras

Husto si Mayor Tomas Osmeña sa iyang pagsaway sa kadagkoan sa Cebu Port Authority tungod sa pagtugot nila nga makapadayon pag-estar diha sa pantalan ang daghang squatters nga makapabati sa dakbayan sa Sugbo.

Tiaw mo, ang mga squatters anaa na mamuyo sulod mismo sa pantalan. Nagbutang sila og mga tindahan apan gipuy-an usab. Sa laktud, daghan sa maong mga naninda diha sa pantalan ang anaa lang usab mamuyo sa sulod.

Sa gibalik-balik na nako kaniadto nga ang pantalan sa ubang lugar - sama sa Surigao - pwerteng limpyoha. Ang mga tindera anaa ra gawas sa pantalan. Angay g'yod tuod nga ang maong mga naninda diha sulod sa pantalan, papahawaon na.

Wala masayop si mayor Osmeña sa iyang pag-ingon nga ang pantalan alang ra gayod unta sa mga pasahero ug sa mga kargamento. Dili na unta kini angay nga pabutangan og tindahan.

Apan dunay usa ka opisyal sa Cebu Port Authority nga misaway usab sa mayor tungod sa kapakyas niya paglimpyo sa aseras gikan sa mga sidewalk vendors nga nakababag sa mga lumalabay.

Husto sab. Makaingon bitaw ko, nga tungod sa mga "conflict" sa lainlaing isyu, ang mga kabus maoy apektado. Apan husto man usab nga limpyohan usab ni mayor Osmeña ang mga aseras gikan sa mga vendors.

Duna man go'y ordinansa ang dakbayan nga nagdili sa sidewalk vending ug ang pagbutang og bisan unsa nga makababag sa mga tawo nga moagi sa aseras. Kon dili kini ipatuman, wagtangon na lang kining maong mga ordinansa.

Akong balikon nga husto si mayor Osmeña pagsaway niya sa CPA nga napakyas sa pagpapahawa sa mga tindera nga anaa maninda sulod sa pantalan, apan wala usab masayop kadtong mga nanaway sa mayor kay napakyas man usab si Tommy paglimpyo sa aseras.

* * *

Ang mga opisyal ug kawani sa Cebu Normal University gimandoan sa Commission on Audit sa pag-uli sa kantidad nga ilang nadawat isip Kalampusan Award.

Ang kinatibuk-ang kantidad nga nagasto sa maong State University, miabot g'yod og kapin sa P3.7 milyones. Ang mga kawani gihatagan og tag P10,000 isip Kalampusan Award sa miaging tuig, samtang ang mga sakop sa Board of Regents tag P20,000.

Ang sayop sa kadagkoan sa Cebu Normal University kay gikuha nila ang maong kantidad gikan sa ilang Trust Fund, ug ang gibasihan niini mao ra ang resolusyon gikan sa Board of Regents.

Ang lagda g'yod unta mao nga angay pa nga aprobahan kini sa kadagkoan sa Civil Service Commission. Unya, dili "across the board" ang paghatag og cash reward kay kinahanglang kadto rang dunay dalaygong binuhatan ang hatagan og reward.

Na hala, iuli na ninyo ang maong salapi!

* * *

Duha ka text message ang akong nadawat kagahapon nga nagkanayon " Ang mga polis diri sa among lungsod sa Bogo, motan-aw ra man sa mga mangisyo og masyaw. Tinuod daghang masyaw diri nga wala matandog."

Wala na ko makurat sa maong inpormasyon kay dugay na man kong nasayod niini. Ang ato na lang unta mao nga mauwaw kadtong mga polis nga nagsiga lang ang mata og walay gihimo sa maong mga illegal nga kalihukan.