Kwarta sa gobyerno ginegosyo?

Diay dakung binuang nga gihimo sa usa ka kanhi cashier sa Cebu Port Authority nga angay g'yod nga aksyonan sa mga opisyal sa maong buhatan sa kagamhanan kana kon dili sila motabon-tabon og mga illegal nga kalihukan.

Awhagon usab nako kini si Romeo Pañares, kanhi cashier nga nadistino sa Base Port sa CPA gikan sa 1996 hangtod sa Disyembre 1, 2004 nga tubagon niya kining gireport sa Commission on Audit sa giingon niyang binuang.

Sa nahuptan nako nga kopya sa annual audit report sa Cebu Port Authority, nahibaw-an nako nga kini si Pañares molangan-langan sa pagdiposito sa kwarta nga iyang makolekta nga para unta sa kagamhanan.

Sa laktod, gamiton usa tingali niya ang kwarta sa laing katuyoan. Mora ba og magduda kita nga ginegosyo ang kwarta sa kagamhanan. Bi unsa may rason ni Pañares nga dugay-dugayon man niya sa pagdeposito sa bangko ang iyang koleksyon?

Dunay lagda ang COA nga ang tanang koleksyon nga salapi nga para sa kagamhanan ideposito dayon sa bangko, labing dugay inigka-ugma gikan sa pagkadawat sa maong kantidad.

Apan klaro kaayo nga kini si Pañares nakahimo og binuang. Tiaw mo, dunay mga bayad gikan sa mga magbubuhis nga gipaagi sa tseke, apan inig-deposito sa bangko paglabay sa pipila ka adlaw, "cash" na man.

Palihug kuno Mr. Cañares, pasabta ang publiko mahitungod niini. Kagahapon, gisuwayan nako og tan-aw ang telephone directory apan wala malista ang imong numero kana kon duna ka may telepono sa balay.

Sayon ra ko nimong makontak Mr. Pañares, padad-i lang og text message kon asa tika makontak. Ang akong cellphone 0917-383-6645 kay aron makapasabot ka sa imong rason kabahin sa annual audit report nga naglambigit kanimo.

* * *

Diay pipila ka ehemplo. Ang Sulpicdio Lines Inc. mibayad og P263,266 ngadto ni Pañares. Ambot og nganong tulo man ka resibo ang giisyu ni Pañares. Usa kini sa akong isukna nimo Mr. Pañares kon magkaestorya ta.

Ang Alcordo International sab mibayad og tseke sa kantidad nga P13,249. Si Pañares miisyu og duha ka resibo nga pinetsahan og Septembre 2, 2003 ug ang laing resibo gipitsahan og Oktobre 21, 2003.

Gibutang sa matag resibo nga ang nadawat niini P13,249 g'yod apan gitunga-tunga. Ngano man ni Mr. Pañares nga usa ra man ka tseke ang gibayad sa Alcordo International?

Ang makapahibulong kay basi sa rekord nga nakuha sa COA, ang tseke numero 44411 nga gibayad sa Alcordo nadeposito sa bangko nianang Septembre 8.

Duna say tseke nga kantidad og P30,612 nga gibayad sa Philippine Port Authority kaniadtong Pebrero 11, 2004 ug ang rekord nagpakita nga na-clear kini sa bangko nianang pagka Pebrero 19.

Ang makapalibog kay ang resibo nga giisyu ni Mr. Pañares pinetsahan man og Marso 5, 2005. Pastilan, "mabuang" ang akong utok sa paghuna-huna unsa ning imong gihimo Mr. Pañares.

Gawas sa maong mga tseke, daghan pa g'yong mga tseke nga ingon niini ang sitwasyon nga dili na lang nato ibatbat.

Karon, hagit kini kaninyo mga opisyal sa CPA kon unsay inyong himoon. Kon nag-imbistigar na kamo niini, pahibaw-a ang publiko kon unsay gisangpotan sa inyong imbistigasyon aron dili sila magduda nga nakigkomboya mo sa iyang binuang.

Ugmang adlawa, hisgutan pa g'yod nato ang uban nga mga kwestyonable nga kalihukan diha sa CPA, ug apilon nato ang Mactan Cebu International Airport Authority.