Kasinatian sa EPS sa BPI

Nakasulay na ba mo og bayad sa inyong gipamalit sa department store gamit ang Express Payment System (EPS) sa Bank of the Philippine Islands o Bank of the Philippine Islands - Family Bank?

Daghan baya ang nalipay nga gitanyag kini sa mga suking mamalitay sa mga dagkong tindahan.

Sama sa credit card, dili na kinahanglang mokuot pa og cash ang kustomer aron bayran ang iyang gipamalit, kay ang ATM card lamang ang ibayad. Sama sa credit card, ang ATM card i-swipe usab unya mopindot ka lang sa PIN number, bayad na!

Makadaghan na ko makasulay nga mobayad gamit ang EPS sukad gitanyag kini sa BPI ug BPI-Family Bank. Dili na ko makahinumdom kanus-a kini nasugdan, apan dugaydugay na gyud kini.

* * *

GUBA. Apan, ayaw kamo'g kompiyansa!

Makadaghan na ko mabalibari sa mga dagkong tindahan nga akong palitan tungod kay off-line ang BPI ug dili sila makaserbisyo gamit ang EPS.

Makadaghan na usab ko makasulay nga na-swipe na ang akong ATM, adunay mogawas nga communication error.

Niadto lang Lunes sa gabii ko nakasinati nga ang kagubaon nianang EPS swiping machine sa counter sa tindahan nga akong gipalitan og karsones makalangay kanako og hapit mo-usa ka oras. Na-late ko sa last period sa klase nako sa University of Cebu - Banilad tungod sa kalangay nga akong nasinati.

Walay sapayan sa kalangay, dili pa gyud unta ko makadala sa karsones nga akong gipalit tungod lagi kay wala mo-function ang EPS swiping machine sa BPI. Ang migawas sa triplicate nga resibo nga giluwa sa EPS swiping machine nga kolor yellow mao ang pulong "communication error." Sa ato pa, wala mogana.

Sa dihang mibalibad na ang cashier o supervisor sa tindahan nga maoy namutos sa mga gipamalit, midalidali ko og adto sa gawas sa tindahan diin didto adunay BPI automated teller machine aron mo-withdraw na lang og kuwarta ug ibayad sa karsones nga akong gipalit.

* * *

SHOCK. Sa dihang nag-balance inquiry na ko, unsa man pagka-unsaa, na-shock ko kay nakuhaan man ang akong kuwarta sa balor sa duha ka karsones nga ako unta paliton.

Mibalik ko sa counter diin gi-swipe akong ATM card. Ang langayan nga supervisor, wala pa gyud makahibalo unsay buhaton. Hasta pud ko naglagot nga naglibog unsay akong buhaton.

Mo-uli lang ba ko nga nakuhaan akong kuwarta sa ATM? Mo-uli lang ko nga wala nako madala akong karsones?

Maayo gani kay dihay naka-asul og uniform nga supervisor nga miduol og misulti sa iyang nasinati nga adunay laing kustomer nga mibalik ug mireklamo kaniya tungod kay sa dihang namalit siya gamit ang iyang ATM card pagbayad, wala mogana, communication error ang pulong migawas sa resibo, apan sa dihang gisusi niya sa balance inquiry, nakaltasan iyang kuwarta sa ATM.

Gipasulat pa ko sa karahong supervisor sa akong ngalan sa papel kay abi man nako og ipadala na lang ang karsones tungod lagi sa sirkumstansiya. Por dios! Wala diay. Gipasulat ko sa akong ngalan, account number, petsa, ug uban pa kay ila pa diay'ng sulatan ang BPI aron pahibaw-on sa bulilyaso sa EPS machine.

Giingnan ko nga tulo pa ka adlaw una mabalik sa akong account ang kuwarta nga nawala tungod sa palpak sa EPS machine sa tindahan nga akong gipalitan.

Wala gyud unta ko makadala sa akong karsones. Mibalik na lang ko sa ATM machine sa gawas sa tindahan ug nagkobra na pud para mabayran ang karsones.

* * *

AWHAG. Atensiyon, BPI ug BPI-Family Bank, susiha sab intawon ninyo nang inyong mga EPS machine nga inyong gipakatap sa mga tindahan nga nag-tie-up sa inyong EPS program.

Kami intawong mga yanong kustomer ang makaluluoy.

Kamong mga hilig magbayad pinaagi sa EPS, hala, pagbantay na kamo aron dili kamo makasinati sa sama nako nga kasinatian - malangay pa, dili pa madala ang imong paliton, makuhaan pa gyud ang kuwarta sa account nimo sa ATM.

Pananglit og walay kalibutan ang kustomer?

Pananglit ini'g gawas sa pulong "communication error" motalikod lang ang kustomer unya mapakyas pagsusi sa balance inquiry sa ATM machine pagsota kun nakuhaan o wala ba ang iyang kuwarta? Nah, wala siyay kalibutan nga nakuhaan na diay iyang kuwarta sa ATM? Ma-TY iyang kuwarta!