Dali nga pangwarta

Wala mo'y trabaho? Duna ko'y tambag kaninyo aron kamo makakwarta og subra pa sa usa ka libo ka pesos ang adlaw, apan ang pangutana - dili ba kamo mahadlok manakop?

Kon gusto mo makatabang sa kampanya sa dakbayan ug sa samang higayon makakwarta, apil isip sakop sa Cebu City Environment Sanitation and Enforcement Team nga maoy tugyanan sa pagpanakop sa mga tawo nga magpataka lang og labay'g basura.

Ang mga sakop sa CESET nga makadakop og tawo nga magpataka lang og labay'g basura makabahin og ¼ sa multa nga makolekta gikan sa dinakpan. Dili ka pa ana?

Pananglit ang usa ka dinakpan makamulta og P500, sa ato pa ang sakop sa CESET nga makadakop makabahin og P125. Kon ang multa P1,000 kay ikaduha na kini nga higayon, P250 ang mahipunta sa makadakop.

Pagka karon, modul-an na sa 1,000 ka tawo dinhi sa dakbayan ang mibulontaryo nga motabang sila sa kampanya pagpatuman sa balaod nga nagdili sa pagpataka og labay sa mga basura sa bisan asa nga dapit.

Ang maong mga tawo direkta nga gisupersahan sa opisina ni Konsehal Nestor Archival, ang tsirman sa committee on environment.

Matud ni Jenny Nodalo, usa ka staff sa opisina ni Archival, nga daghan pang mga tawo ang mipadayag og tinguha pagpasakop sa CESETnga manakop sa mga dili motuman sa lagda paglabay sa basura.

Adunay duha ka rason ngano nga daghan ang mipadayag og tinguha nga magpasakop sa CESET. Kini mao nga mahadlok sila nga mapasakaan og kaso ang ilang mga pinangga nga opisyal, ug ikaduha mao nga nadani sila sa gitanyag nga pahat ngadto sa makadakop.

Samtang alegre og nindot huna-hunaon nga makakwarta ang maong mga tawo, nabalaka ko nga tingali'g dili dantan og pila ka adlaw, mabalhin ang ilang mga birthday kon dili sila magmatngon.

Basin og ang Abril 6 nila nga birthday, mausab na kini ngadto sa Nobiyembre 1, ang adlaw sa mga patay.

* * *

Nadugangan ang sketch nga akong nahuptan kabahin sa mga drug pusher. Nahibulong lang ko, Mandaue man kini og Lapu-Lapu, minus man dinhi sa dakbayan.

Ang akong informer nga mihatag niining maong report nagpatawag lang og Agent768678.

Ang daghang mga drug pusher anaa kini mag-operate sa barangay Cambaro, Mandaue - dili halayo sa barangay hall. Dili usab layo sa basketbolan sa maong dapit.

Diay ngalan sa mga drug pushers ug ang ngalan sa tag-iya og tindahan sa maong dapit nga maoy giila nga financier sa mga pusher.

Dunay uban nga mipadala nako og inpormasyon apan dili kapahimuslan. Dili usab ko kabasol ninyo kay wala man kamo makaagi og bansay-bansay unsaon paghimo og report.

* * *

Ilawom sa taytayan sa first Mactan-Mandaue bridge, duna ko'y report nga dunay pusher diha nga si Jimmy. Sigun pa sa report nga ang kaubanan aning Jimmy sila si Jikjik, Butyok ug Noel.

Mga polis sa Mandaue, panid-i ninyo kining mga tawhana. Mahimo usab kamo nga motawag nako.

Ang akong cellphone - 0917-383-6645.