Palitan una natog kapote ang Citom

Gumikan sa reclamation issue tali sa mga dakbayan sa Sugbo ug Talisay, kitang taga-Cebu, pinaagi sa atong mayor, nangambisyon nga atong huboan ang Talisay sa iyang pagka-city, ug within two years, ato silang ipa-bangkarota.

Sa ato pa, ato silang pagutman. Ngiga nato no?

Hawra nato no?

Apan, una sa tanan, sa dili pa nato i-implement kining atong ambisyon, palitan una natog kapote, mga raincoat, ang atong mga sakop sa CITOM.

Ting-uwan na. Dihay pagbunok sa uwan, mga alas 5:30 sa hapon, naatlan mi diha sa Osmeña Blvd. (Jones Ave.) padong sa Capitol. Mga 30 minutos kaming natanggong, diha na duol sa Fuente.

Ngano man? Kusog kaayong uwan. Waa na moirog ang mga sakyanan, labaw pas bumper-to-bumper. Ug waay nag-direct sa traffic. Sa ato pa, waay CITOM. Waay CITOM tungod kay waay kapote.

Mao nga bisan unsa man ang atong mga ambisyon ning atong siyudad, sa dili nato pobrehon ang silingang Talisay, palitan unta natog kapote ang atong mga sakop sa CITOM aron dunay maka-direct sa traffic bisag mag-uwan.

Mas barato man tingali ang mga kapote kay sa mga Advednture sa mga konsehal. Di ba, Mayor?