Kumander Kosovo sisikat pa!

KUNG pagbabasehan ang mga balitang lumabas kahapon tungkol kay Alhamzer Limbong Manalad, aka Kumander Kasava este mali Kosovo pala mukhang magiging star of all season ito.

Gusto kasi ng Kano na dalhin sa US of A si Kumander Kosovo para doon imbestigahan hinggil sa ginawang pagpatay at pagkidnap sa mga foreigners noon sa Mindanao.

Kung hihiramin o aarburin ng mga Kano si Kumander Kasava este Kosovo pala, iyan ang hindi pa natin alam sa ngayon.

May grupo umano ng US-FBI ay pupunta sa Pinas tungkol kay Kumander Kasava este mali Kosovo pala.

Si Kosovo, ay miyembro ng kilabot na bandidong Abu Sayad este mali Sayyaf pala.

May mga kaso ng murder, kidnapping for ransom, illegal possession of ugly face este mali firearms and explosives pala si Kumander Kasava este mali Kosovo pala dito sa Pinas.

Si Kumander Kosovo ay nakakulong ngayon sa Camp Bagong Diwa, Bicutan, Taguig.

Sana huwag itong maglahong parang bula sa kanyang karsel.

Sabi nga, baka may magic na mangyari kay Kumander Kasava este mali Kosovo pala.

May mga kaso rin palang isinampa ang mga Kano sa US of A versus Kasava este mali Kosovo pala.

Kung anuman ang mga legalidad sa nasabing isyu hayaan na lamang natin ang hukuman ang humusga kay Kasava este mali Kosovo pala.

Mas importante sa mga kuwago ng ORA MISMO, nahuli ito ng buhay!

"Tama bang ipahiram ng Pinas si Kosovo sa mga Kano?" tanong ng kuwagong Kotong cop.

"Sa palagay ko hindi," sagot ng kuwagong manlilinglang.

"Pinoy ba si Kasaba?" tanong ng kuwagong maninisip ng tahong.

"Sa pangalan lang makakain na ito."

"Kamote, Kosovo hindi kasava ang pangalan niya."

"Mukhang Russian?"

"Sa pandinig lang," anang kuwagong SPO-10 sa Crame.

"Bilib ang mga kuwago ng ORA MISMO sa intelligence work ng taga-2."

"Talagang magaling ang intelligence networking ng ating awtoridad kahit na walang pera may mga big-time na nasusungkit."

"Dapat suportahan sila."

"Iyan ang gagawin natin after election."

"Ang bumoto?"

"Hindi ang bigyan sila ng budget."

"Palagay ko tama ka diyan, kamote."

"Ang bigyan sila ng pera?"

"Hindi para bantayan nila ang ating kaligtasan."

"Tumpak ka, lagapot."