Mga atraso ni Chiz

Ang paugat ni Senate President Chiz Escudero nga pagyaka sa impeachment trial ni Bise Presidente Sara Duterte dili maoy labing una niyang atraso sa nasud ug sa katawhan: Kon dili pa tungod niya:

• Dili unta magkadugo ug mabangkarota ang Pilipinas sa nagsunod nga abusado ug kurakot nga mga administrasyon nilang kanhi presidente Rodrigo Duterte ug Presidente Ferdinand Marcos Jr.; ug

• Malambuon untang Pilipinas kay nasundan si anhing presidente Noynoy Aquino og tarung nga mga presidente nga wala mangawkaw sa pandemya ug wala mosurikbot sa nasudnong panudlanan pinaagi sa Maharlika fund.

* * *

Kon dili pa tungod sa maniobra ni Escudero, si Mar Roxas unta ang nidaog sa pagka bise presidente sa 2010. Siya ang gipasanginlan nga utok sa kampanyang “Noy-Bi” pagsakay sa popularidad ni Noynoy human sa kamatayon ni anhing presidente Cory Aquino ug pagsabotahe ni Roxas maong nakalusot si kanhi bise presidente Jejormar Binay.

Kon si Roxas pay bise presidente ni Noynoy, mas dako unta ang iyang kahigayonan nga makapuli sa Malacañang sa 2016 ug mapadayon ang pagtubo sa ekonomiya sa Pilipinas nga maoy labing paspas sa tibuok Southeast Asia.

* * *

Kon dili pa tungod sa pagbabag ni Escudero, nadayon unta ang pag-us-os ni Grace Poe pagka bise presidente ug nagka-pares unta silang Roxas. Wala unta kalusot si Duterte ug wala unta kabuylo ang laktod nga pinatyanay ug lapad nga binayranay sa iyang pekeng drug war.

Wala unta mapilde ang binilyon ka pesos sa Pharmally ug ubang mga transaksiyon ug wala unta niburot ang utang ug nahagsa ang ekonomiya tungod sa pataka nga lockdowns ug pagdumala sa pandemya.

* * *

Palandonga kon nagsunod pa sa pagdumala sa Malacañang human ni Aquino silang Roxas ug Leni Robredo. Wala unta kabalik ang mga Marcos sa Malacañang, wala unta mabasura ang mga kaso sa ilang kinawat nga katigayonan ug dili unta mameligrong mapapas ang ilang utang sa estate tax nga ?203.8 bilyones.

Salamat sa pagpalabi ni Escudero sa iyang personal nga interes, nabihag ang nasud karon sa unay sa mga Duterte ug mga Marcos human nag-ilaray sa UniTeam. Ug salamat sa walay kinutobang kahakog sa gahom ni Escudero, gipahimuslan ang impeachment aron pagpalambo sa iyang politikanhong ambisyon.