Itom nilang bakak
Mosumbalik ang tanang pasangil nilang Bise Presidente Sara Duterte ug Senador Imee Marcos sa desperada nilang lakang pagtabang sa nitibugsok nga kampanya ni Imee pagbalik sa Senado. Kay mga opisyal sila sa duha ka nagsunod nga administrasyon nga responsable sa ilang gihulagway nga kagutom, krimen ug inhustisya.
Si Sara anak ni kanhi Presidente Rodrigo Duterte ug mayor sa Davao City sa wala pa mahimong bise presidente. Si Imee sakop sa Senado ug nangangkon og kredito pagpadaog sa duha ka presidente. Maong dako sila og tampo sa masulub-ong kahimtang sa nasud.
-o0o-
Ang lapad nga kagutom nga nahiagoman sa katawhan karon atol sa administrasyon ni Presidente Ferdinand Marcos Jr. kalabwan lang sa mas grabeng kagutom atol sa admiinistrasyon ni kanhi Presidente Rodrigo Duterte. Si Duterte maka-rason sa kalibotanong kalisod tungod sa pandemiya sa Covid-19.
Si Marcos walay laing mabasol gawas sa kapakyas sa iyang gisaad nga barato ug abundang pagkaon (apil nang gipanumpa atol sa kampanya sa 2022 sa paghimo nga P20 sa kilo sa bugas humay) human namugos sa pagdumala sa Department of Agriculture sa unang tuig sa iyang pamunoan.
-o0o-
Sa pagbadlong sa krimen ug inhustisya nakabentaha si Marcos:
Niubos ang kriminalidad atol sa iyang administrasyon kay gihunong ang duguon nga drug war ni Duterte (nga peke sab kay imbes mosulbad nipasamot hinuon sa ilegal nga drugas) nga gibanabanang nipatay og hangtod 35,000 ka kinabuhi; ug
Nahatagan og mas dakong kahigayonan nga makab-ot ang hustisya sa mga biktima sa extrajudicial killings tungod sa pagsurender ni Duterte ngadto sa International Criminal Court.
-o0o-
Sa ilang pag-itom aron pagbangotan sa wala masulbad nga mga problema sa nasud, dili katulisok si Imee sa iyang manghod ug dili kasukmat si Sara sa iyang kanhi BFF sa walay pagbasol sa ilang kaugalingon. Silay nagpahimutang sa Marcos administrasyon sa gahom (dili na lang ta maghisgot kon gipaagi ba nila sa vote buying ug fake news ug ubang maniobra).
Hinunoa, angay silang mangayo og pasaylo sa tanan nilang atraso (oo, apil ang pagkulata og court sheriff ug pagpatay og aktibista). Ug hinaut tugkan og uwaw ug dili na mohimo og itom nga pasalig nga sila ray makasulbad sa mga problema sa nasud.
- Latest
