Posibleng mga kaso ni Gwen

Inilang abogado sa Sugbo gihilasan sa pag-insistir ni outgoing Governor Gwen Garcia, dihang na-interview sa The FREEMAN sa niaging semana, nga siya ang magbuot kanus-a motunol og mga dokumento ug kanus-a makigtagbo sa mga sakop sa transition team ni Governor-elect Pam Baricuatro.

Giluod na g’yud siya dihang giawhag pang Garcia si Baricuatro ug ang provincial director sa Department of Interior and Local Government (DILG) sa Sugbo, si Dr. Jesus Robel Sastrillo Jr., sa pagtuon sa mga lagda nga nagsugo nga ang incumbent nga mga opisyal mao ray agdon sa transition.

***

Maong gipalihug ang paralegals sa iyang opisina pagtuon sa mga lagda sa transition gikan sa outgoing ngadto sa incoming officials sa local government units. Nahibaw-an nila nga dili si Garcia ang magbuot sa transition. Kon dili ang mga probisyon sa:

•             DILG Memorandum Circular (MC) 2025-016 nga giluwatan karong tuiga;

•             Local Government Code (Republic Act No. 7160);

•             Administrative Code of 1987 (Executive Order 292);

•             Code of Conduct and Ethical Standards for Public Officials and Employees (RA 6713);

•             Anti-Graft and Corrupt Practices Act (RA 3019); ug

•             Revised Penal Code (RA 10951).

***

Gilista nilang mga kasong administratiba nga mapasaka batok ni Garcia kay ang paglangay sa transition makahasol sa serbisyo sa publiko: Neglect of duty; gross misconduct; abuse of authority; ug conduct prejudicial to the best interest of the service.

Gilista sang mga silot kon mapamatud-ang sad-an: censure o reprimand, multa (hangtod sa unom ka buwan nga suweldo), suspenso (hangtod sa usa ka tuig), demotion, o dismissal (nga moresulta sa forfeiture of benefits ug perpetual disqualification from holding public office).

***

Tungod sa kadako sa kadaot nga mamugna sa kalangay sa transition, mahimo sang malapas ni Garcia ang mosunod nga mga probisyon sa Revised Penal Code: Article 218 (Failure of Accountable Officer to Render Accounts); ug Article 217 (Malversation of Public Funds or Property). Ug ang Section 3(e) ug Section 3(f) sa Anti-Graft and Corrupt Practices Act.

Nga nagtangag sa mosunod nga bug-at nga mga silot: Pagka-priso gikan sa unom ka tuig ngadto sa 15 ka tuig; perpetual disqualification from public office; ug confiscation o forfeiture of any prohibited property or its value.