Quiboloy di na kublan

Kon tinuod ang mga pasangil batok sa organisasyon ni Apollo Quiboloy, wa silay kalainan, mahimo gani nga labaw pa ang mga krimen nga nahimo, sa gipasanginlang kulto sa Sitio Kapihan, sa Barangay Sering, sa lungsod sa Socorro, sa probinsiya sa Surigao del Norte.

Na-imbestigar dayon sa Senado ug gani napriso na ang kadagkoan sa Socorro Bayanihan Services Inc. (SBSI). Pero way nangahas sa pag-imbestigar sa Kingdom of Jesus Christ (KOJC) ni Quiboloy dinhi sa nasud, bisan kon dakpunon na siya sa Federal Bureau of Investigation (FBI) sa Estados Unidos.

* * *

Kublan si Quiboloy sa Pilipinas (nabasura ang mga kasong kriminal, nga susama sa mga pasangil sa FBI, batok ni Quiboloy sa Davao City) tungod sa iyang kasuod ni kanhi presidente Rodrigo Duterte.

Pero napupos nang termino ni Duterte. Di na maayo ang relasyon tali sa mga Duterte ug sa administrasyon ni Presidente Ferdinand Marcos Jr. Gitangtang nang confidential funds ni Bise Presidente Sara Duterte Carpio. Nag-atubang na og kasong kriminal si Duterte sa paghudlat sa usa ka kongresista. Mahimong wa nay igong umoy ang padrino ni Quiboloy.

* * *

Human gilusad ang imbestigasyon sa kongresista sa red-tagging ug pagpakatap og sayop nga kasayuran sa pipila ka magsisibya sa TV network ni Quiboloy, nga mahimong moresulta sa pagka-suspenso o pagkabasura sa prangkisa sa Sonshine Media Network International (SMNI), ang mga senador mahimong mosentro ni Quiboloy sa ilang buwag nga pakusisi.

Ang SMNI nipasalig sa mga kongresista nga si Quiboloy nga blocktimer ra ug di maoy tag-iya sa network. Mas lisod patuohon ang mga senador nga pahoy si Quiboloy sa iyang KOJC.

* * *

Gilista ni Senador Risa Hontiveros sa iyang resolusyon pag-imbestigar sa KOJC sa mga pasangil batok ni Quiboloy: Brainwashing, pagpanamastamas sa babayeng mga sakop, apil ang mga bata, ug pagpugos sa mga dagko ug mga bata pagpakilimos sa kadalanan.

Way kalainan sa mga kaso ni Quiboloy nga gibasura sa Davao prosecutors: rape, child abuse, physical abuse, trafficking in persons through forced labor ug trafficking in persons through sexual abuse. Susama sa mga kaso sa FBI: Conspiracy to engage in sex trafficking by force, fraud, and coercion, sex trafficking of children, ug sex trafficking by force, fraud, and coercion.