Ilang pawungon ang paglaom
Kon molampos ang mga Marcos sa pag-abli pagbalik sa kaso sa ilang utang sa estate tax nga P203.8 bilyones, bisan pa nga nahimo nang final and executory ang desisyon sa Korte Suprema niadtong 1997, o 25 ka tuig na ang nilabay, mabantang sa tibuok kalibotan ang mosunod:
• Way klaro ang pagpatuman sa mga balaod sa Pilipinas;
• Nagpadayon ug mahimo nga nisamot pa ang pagtuo sa mga opisyal sa gobyerno ug sa ilang mga pamilya nga bisan unsay ilang himuon di sila manubag;
* * *
• Ang mga balaod sa Pilipinas kutob ra sa mga gagmay sayon nga mopapriso sa kawatan og manga pero di kaabot sa mga nibolsa og binilyon sa buhis sa katawhan;
• Ang paghupot og politikanhong gahom lisensya sa pagyatak sa mga balaod;
• Nakutkot na sa pangurakot ang atong sistema sa hustisya; gawas sa pipila nga ligdong ug isog, ang mga huwes apil nang mga mahistrado sa mas taas nga mga korte kurog sa mga nagtungkawo sa gahom;
• Lahi ang balaod para sa mga Marcos ug sa ilang mga alyado kay sa mga lagda para sa mga kargador sa pantalan, mga pakyaw sa pabrika, ug mga tigbaligya sa Carbon;
* * *
• Lokal ug langyaw nga mga negosyante angay nga mangandam nang daan sa way kinutoban nga kausaban sa mga balaod labi na kon layo sila sa luwag;
• Gitinuod sa mga Marcos ang kinadak-ang kahadlok sa katawhan ning ilang pagbalik sa gahom;
• Masaligon ang mga Marcos nga ang suporta sa 31 milyones magpabilin tungod sa ilang troll army nga molumos sa bisan unsang lehitimo nga diskusyon sa mga panghitabo sa nasud;
* * *
• Kon mapakyas ang atong mga balaod pagpabayad sa ilang utang sa buhis, unsaon man pagpugong nila sa pagtumpi og dugang ilegal nga katigayonan;
• Kon ang mga botante magpaka buta sa pagpahimulos sa mga Marcos, nganong maghago pa man ang tarung nga mga politiko pagtanyag sa ilang serbisyo sa umaabot nga mga eleksyon; ug
• Ang paugat sa mga Marcos gitumong sa pagkumbinser sa nasud ug sa katawhan nga way kahigayonan nga molampos ang bisan unsang pagsuway sa paglingkawas sa mga kuko sa ilang kahakog ug way busganan nga kahangol --busa, nganong ato man silang tugotan?
- Latest
