Gatas sa dagat

Mapasalamaton ang mga mangingisda sa Talisay City nga naminaw sila sa tambag sa ilang katiguwangan nga ang sayo nga manikay-sikay maoy makasipong sa isabod nga grasya. Sa sinugdanan, gipakaingon nila nga kasarangan rang adlaw sa panagat gahapon: Nihit ang isda nga nakuha. Magsugod na unta sila og mahay nga ang nag-usbaw nga industriyalisasyon sa kadagatan sa Talisay maoy nakapakagiw sa mga isda, dihang nagkabag-iray ang duha ka barko sa ilang duol.

Nakasipong gyod tuod sila sa grasyang gisabod. Labihang daghanang karton nga kahon ang nanglutaw sa dagat paingon sa ilang nahimutangan. Isda maoy ilang gipangita, kinahon nga gatas ang nikubit ug nipuno sa ilang mga sakayan.

* * *

Mga mangingisda nga unang nakakuha sa kinarton nga gatas igo lang untang nanghatag sa ilang mga silingan. Tungod sa kadaghan sa nag-abut-abot nga mga kinarton nga gatas, nakahukom sila nga ipamaligya na lang. Wa hinuon magkasabot sa presyo. May namaligya og P30, ang uban P40, kasagaran P50 sa matag putos sa gatas nga tag dul-an sa P100 sa mga tindahan.

Labihang daghanang nag-ilogay pagpalit. Tag 30 ka putos sa gatas sa matag kahon. Maong kasagaran sa mga mangingisda sayo nga namauli ug namahuway. Bawon ang kaliboan ka pesos nilang kita. Igo na lang gisud-an para sa mga sakop sa pamilya ang tagsa ra ka kilong isda nga nakuha.

* * *

Imbestigahon pa sa Philippine Coast Guard (PCG) kinsay sad-an sa nagkabangga nga mga barko nga pulos paingon sa Dakbayan sa Sugbo—ang pamasahero nga MV Super Ferry 2 nga gikan sa Nasipit, Agusan del Norte ug ang de karga nga MV General Romulo nga gikan sa Cagayan de Oro City, nga maoy nahimutangan sa higanteng planta sa gatas. Gidudahan hinuon nga nag-ilog sila pag-una pagsud sa Lawis Ledge, ang gamay’ng agianan sa tanang barko gikan sa Mindanao paingon sa Sugbo.

Garas ra sa kilid ang nahiagoman sa mas dako nga Super Ferry 2, maong gipalahos sa iyang destinasyon sa Manila ug naluwas ang gatosan ka mga pasahero gikan sa pagkatanggong. Igo ra hinuong gideklarar nga seaworthy apan wa pa makalingkawas gikan sa kahigayonan nga maoy sad-an.

* * *

Mas daghan og tulubagon ang mga tripulante sa General Romulo: Tinuod bang nagtibuwaag ang container vans sa ilang kargamento? Tinuod bang naabli ang usa sa vans maong nangalagpot ang kinarton nga gatas ug nanglutaw sa kadagatan? Wa ba diay matarung paghigot ang kargamento—usa sa batakang lagda sa luwas nga paglawig?

Bisan sa kalapad sa dagat, may mga aksidente gihapon nga mahitabo. Salamat sa pagpabaya ug pagkiat sa mga tripulante. Hinaot tinud-on sa PCG ug Maritime Industry Authority pagtino kinsay nasayop. Mas mahinungdanon ang kaluwas sa kinabuhi ug kargamento, bisan itandi pa sa pagsabod og grasya alang sa mga mangingisdang kugihan.

Email: [email protected]