Kinsay gisuspenso?

Gihunong sa mga imbestigador sa Artsidyosesis sa Sugbo ang ilang pakisusi sa pasangil nga nagbinastos ang usa ka pari samtang nagpakumpisal sa babayeng mga tinun-an sa Abellana National School sa niaging buwan kay wa kaila ang mga biktima sa pari. Apan sa samang higayon ilang gipahibawo nga gisuspenso nang pari. Si Arsobispo Ricardo Kardinal Vidal niingon nga di siya mapugos pag-ila sa pari sama nga di nila mapugos ang pari pagpakita sa publiko sa way paglapas sa iyang tawhanong katungod. Apan wa mapatin-aw sa talahurong kardinal nganong samtang nabalaka sila nga malapas ang katungod sa pari batok sa "self-incrimination," wa sila managana pagyatak sa iyang katungod sa "due process" pinaagi sa pagsuspenso dayon sa pari. Nga kay wa pa man gyod ilha way nakaseguro kon tinuod bang gisuspenso o padayong makamisa-ug makapangumpisal.

* * *

Kay mao pa man ni ang labing unang pagkauswag sa Asean Summit sa kinatibuk-ang 39 ka tuig nga kasaysayan sa kahugpongan, way nakasulti nilang Pres. Arroyo nga ang pagtakdo sa schedule sa tanang heads of state sa Asean ug sa unom ka nasud sa East Asia di sama kasayon sa pag-uswag sa summit nga napahigayon unta sa Sugbo karong semanaha ug sa pagtakda og bag-ong petsa unya sa Enero 11-13, 2007. Sa 15 ka mga pangu nga andam na untang manganhi sa Sugbo, upat pay niuyon sa gisugyot nga summit sunod buwan:

• Si Indonesian President Susilo Bambang Yudhoyono motambong apan ang iyang tigpamaba nga si Dino Patti Djalal niingon nga unya na ni nila opisyal nga ipahibawo;

• Si Thai Prime Minister Surayud Chulanont seguro nang makatambong segun sa iyang tigpamaba nga si Yongyuth Mayalarp;

• Si Malaysian Prime Minister Abdullah Ahmad Badawi makatambong sab; ug

• Si Cambodian Prime Minister Hun Sen, bisan sa iyang pangangkon nga gawas sa bagyo terorismo ang nakapauswag sa summit.

* * *

Ang maayong balita mao nga si Primero Ministro Shinzo Abe sa Japan ganahan sang motambong sa summit bisan kon ang bag-ong mga petsa mosukwahi sa iyang biyahe sa Uropa sa Enero 6-14. Matod ni Shinzo mahinungdanon ang Asian diplomacy kinahanglang hapsayon ang schedule (nga maoy iyang diplomatikanhong paagi pag-awhag sa Pilipinas nga, "Mahimo bang ibalhin ninyong summit sa mga adlaw nga mahiuli na ko gikan sa Uropa ug nga di na ko mahigot sa mga gimbuhaton sa Diet?").

Mas diplomatikanhon tinuod si Abe kay sa iyang Economic, Trade and Industry minister, si Akira Amari, kinsa nipasangil nga lisod nang mapahigayon ang summit ug nga nawad-an nag credibility ang Pilipinas tungod sa pagkakak sa hinayng bagyo. Apan gikahadlokan nga ang iyang pagtambong o pagpalta sa summit sunod buwan mao say basehan sa kinabag-an sa heads sa state nga wa pa sab magdalidali pag-umol sa ilang baruganan.

* * *

Email:[email protected]