AKAP hindi pork barrel – DSWD

MANILA, Philippines — Nilinaw ni  Department of Social Welfare and Development (DSWD) Secretary Rex Gatchalian na ang Ayuda para sa Kapos ang Kita Program (AKAP) ay hindi isang pork barrel.

Ang paglilinaw ay ginawa ni Gatchalian matapos ang   pahayag ni retired Senior Associate Justice Antonio Carpio kung saan  inihalintulad niya ang cash assistance ng AKAP sa kontrobersyal na pork barrel system at nagmungkahi na ang mga opisyal ng barangay ang magsumite ng listahan ng mga benepisyaryo.

Paliwanag ni Gatcha­lian,  hindi ang mga opis­yal ng barangay ang responsable sa pagtukoy ng mga benepisyaryo ng programa kundi ang field offices ng  DSWD.

Ang mga social wor­ker din aniya ng DSWD ang nagpoproseso ng mga aplikasyon para sa AKAP at sila ang nagdedesisyon kung magkano ang halaga ng tulong na matatanggap ng mga kwalipikadong benepisyaryo.

Subalit nilinaw ng kalihim na walang probisyon sa mga patakaran ng AKAP na nagpapa­hintulot sa mga opisyal ng barangay na tukuyin ang mga benepisyaryo ng cash aid ng programa.

Dagdag pa ni Gatchalian  na bagama’t ang mga mambabatas at lokal na opisyal ay maaaring mag-refer ng mga potensyal na benepisyaryo, ang mga social worker ng departamento ang siyang nagsasala ng listahan ng mga tatanggap.

Sa ilalim ng panukalang 2025 national budget naglaan ang kongreso ng P26-bil­yong pondo para sa AKAP, at inaasahang pipirmahan  ni Pangulong Ferdinand “Bongbong” Marcos Jr. sa susunod na linggo.