Ex-pulis itinumba sa Caloocan

MANILA, Philippines — Patay ang isang dating pulis matapos na pagbabarilin ng riding-in-tandem nitong Sabado ng madaling araw sa Caloocan City.

Dead-on-arrival sa Caloocan Medical Center (MCM) si alyas “Christian”, 40, dating miyembro ng Malabon City Police dahil sa mga tama ng bala sa iba’t ibang bahagi ng katawan.

Isa naman sa mga suspek ay nakilalang si alyas Jay, 27.

Batay sa report, nangyari ang insidente dakong alas-4:20 ng madaling sa A. Mabini St., Brgy. 15, ng nabanggit na lungsod. Sinita at hiningan ng biktima ng lisensiya si alyas Jay na driver ng Mio Motorcycle (8162-UO) at tinanong kung ano ang ginagawa sa Libis Nadurata St.. Gayunman, biglang lumapit ang isa pang lalaki na naka-helmet at pulang t-shirt at pinagbabaril ng ilang ulit ang dating pulis.

Matapos na makitang napuruhan ang dating pulis, tumakas ang mga suspek at iniwan ang gamit na motorsiklo.

Napag-alaman na nasibak sa tungkulin ang biktima dahil nag-AWOL (absent without official leave) sa kasagsagan ng Oplan Tokhang.