Estudyante nadaganan ng dyip, patay

BALATAN, Camarines Sur, Philippines —  Nagkalasug-lasog ang katawan ng isang estudyante matapos madaganan ng pampasaherong jeep na kanya mismong sinasakyan habang anim na pasahero pa ang sugatang isinugod sa pagamutan makaraang mawalan ng preno at tumagilid sa kahabaan ng national highway ng Zone-4, Brgy. Cabanbanan, Balatan, Camarines Sur, kamakalawa ng umaga.

Dead-on-the spot ang isang lalaking estudyante na kinilala lamang sa pangalang “Frank” na isang first year college sa bayan ng Nabua dahil sa matinding pinsala sa katawan. Anim na mga kapwa pasahero ang isinugod sa hospital dahil sa tinamong mga sugat sanhi ng aksidente.

Sa ulat, dakong alas-10 ng umaga binabagtas ng pampasaherong jeep na may plate number EVA-865 ang kahabaan ng highway nang pagdating sa lugar ay nawalan ito ng preno.

Nang gumewang ang sasakyan ay tumalon ang nakasabit na biktima dahilan para madaganan siya nang tumagilid ang jeepney.

Agad rumesponde ang rescue team ng BFP-Balatan, mga pulis at mga tauhan ng MDRRMO at isinugod ang mga sugatan sa hospital habang patay nang inabutan ang biktimang napuruhan.